HLICHHY NATA HLY-Â.
By : V. Chozah
Hlâno AD. 300 hlei a sie hapa liana khata Mara Satlia nata Laisa kyh apacha ngâsâpa âti theileipa Hlichhy nata Hly-â y ei ta, âmo he Zyhnopa chi ama châ, ama thâtih he, Mara phôpa liata cha rei ahlao chaipa ama châ, amo hmâpata, Mara satlia nata Laisa kyh apacha ta, ati theilei pa zyta hna apangâ n’awpata, Hlichhy nata Hly-â hma ta, chosu lei tawh achhai vei ma,tahpata hla ama vaw phi pâ ngâpa achâ, cha y zie cha amo tluta kyh apachâ vei ei tahna achâ . Hlâno tawhta ama thâtih he rei za hlao ta, Mara chi nata pho âdua chhôh ta cha, ama thâtih he lei khao aw vei, khizaw lia hmahta kyh âpachâpa rei ahlaopa ama châ nata pangiasa âchhihpa a châ. Hlichhy nata Hly-â he Zyhno chi châ ei ta, Kabâtlâh za chhana Radôh su liata khih ama sa nota amo he satlia laisa âkhopa ama châ.
Marapa ta cha, Paw ahneikhao leipa he, ‘Harapa’ tah eita, Nô & paw ahnei khao leipa he,’Hara koropa’ ama tah, Hlichhy he nô nata paw dei chhao châ leipata pilâh unawh nata sietanô dâhdei chhao ahnei khao leipa Matlupa châ ta, he vâta chyhsa zy chhaota ama vaw mo hnao kaw ei awh. Chahrasala, Hlichhy he Dôhla azopa achapa vâta ano liata thei atahna khâchâ y ta, kâchhiena nahta nozana hnei hlei vei, Hly-â he abeisaw hmata châ sala, apalôhrupata hnei thei’pata angâna a hnei thla ha. Hlichhy he satlia hmipha kawpa, pôhrao atlai kawpa nata mongyu lâchhâ châ ta, chyhsa chaolie hua kawpa nata âhlâhlô kawpa, khikha satlia âpachy tlâh achâpa a châ hra.
Hly-â he abei chhôh apuapa châ ta, laihsa pôraoh phapa nata chhithai ngâsâpa, khi kha laihsa sopa nata hmiphapata reipa a châ hra.Hlichhy nata Hly-â he ama chyhta no tawhta aviasa kawpa châ ei ta, Satlia nata laihsa ama châ tawhta kyh âpachâ ta âkho ngâsâpa, âpathlie thei khao leipa ama vaw cha.
Nohkha cha Hlichhy ta lyuchapa tuah ta, Hly-â nôpaw zy ta hara koropa achâ hleikhô ta dychhiepa, matla malapa achâpa vâta vaw paryhsa veih ei, lyuchâpa hnohta, “Hlichhy cha khapa ma mia a mâ aw? akârupa ma miah amâ aw”, vaw tah ha ei ta, eino eithô ahiah chaneipa chhaota vaw paryhsa v’ei. Chavâta Hlichhy chhao chata hia chanei’pa achhuah khao hra vei.
Khihsawzy ta Hlichhy cha ama ngiachhie ngâsâ saita, he hawhta hla ama phipâ;
“Hlichhypa chatluta vâsâh a tao,
Lyubie athaipa ma tôh a bô va.”
Hlichhy ta hla lilaw ta a chhy palie ta, he hawh ta;
“Lyubie thaipa Sôchiah paw aw ula,
Âbâh ta dyuchei laih la vâna e” tah pata â chhy ei.
Châhrasala Lyuhbie athaipa lyuchâhpa a tua heihpa chhao ta, vaw paryhsa pyly veih ei.
Nohkha cha, Lauchei bei Sawchapawpa Beisao ta, Hly-â cha lapinô châta vaw hiah ta,Hly-â nô pawzy chata abeisaw lapinô a châ awpa cha khoh ngaita ei ta, paryhsa ha ei ta, khihro lâta dyhchâ awpa a châhapa vâta Hlichhy nata Hly-â cha ama palôhru rie thei ngâsâ ta, châhrasala tao n’awpa pahno hlei veih ei. Âmo châta lâpi a y chhôhpa cha khih puasaipa he a châ.
Zâta ama peimawhpa zydua apachhuah ei ta, khih cha ama puasai haw, khatai lâ ma eima ngai aw tahpa chhao pahno leipa ei ta, Vâhâ Chavah kei tlô ei ta, amâ pahâ thlâh no ta, Hlichhy he pasaipha râh âkhie tyhpa a châpa vâta Vahâ Chavah hnawh liata lôkhao pha kawpa, ti yna su, chyhsa ta ama tly beihleina su lôkhao yna pahno ta, cha lôkhao lâ cha ama kaw ngai haw.Lôkhao liana heta yna a paryh ha ei ta, nochhôh lâta Chhuapu liata y tyh ei ta, azo lâta Lôkhao liata amâ rie tyh. Nochhô lâta Lyurâhpa bia zy chao tyh ei ta, a châta cha Chhuapu liata Hly-â chata thaizy a sa tyh. Hlichhy chhao cha Hly-â thaisana kiah liata Meithei padua ta, azo lâta ama hua tyhpa lahua va la ta, ahua ta, athaisana kiah liata âziapâ tyh. Nohkha cha Hly-â thaisana kiah liata Hlichhy ta âziapâ thlâh no ta, Mongyu Pheisai zakha hri (100) Kahrie tlâh kaw tho ngâpa he va hmô ta, vâhnei chhih kawpa ta Hlichhy nata Hly-â cha hmô leipata khôsai ha ei ta. Hlichhy ta he hawhta hla a phi:
‘Karô zakha kahrie tlâh kaw tho ei,
Eima nyuna Chhuapu pahlyu veih ei. tahpata.’
He Mongyu Pheisaih zy he Dawhlei khih kiapâh liata Âhmykô lai kawpa abuhta tikha tu akhu thlâh hapa âsâh ngâsâpa cha ‘England beinô râhzânô O na noh apahli’ tahpa ta a chiah thlâ awpa ta âkhypa hawhta ama reih.
Nokha cha Hlichhy nata Hly-â he Kahrie tlâh lâ khy ei ta, chaliana chata palao ei ta, ama nie awpazy ama pachhâ hapa vâta, Hly-â cha apalôru rie thei ngâsâ ta, khi lâ zu mawh sala anôpawzy ta Lauchei bei Beisao lâ ta dyhpachasa h’awpa a cha vâta ama palôru rie thei ngâsa ta, Kahrie tlâh liata chahlyu thi zy cha sâh ta vaw châ hala tahpa ta hla ta he hawhta a phi,
“Kahrie awphao Bata cheinô châ la,
Ona nieba, ei ngia Hlichhy nie bâ”
Ama y na Chhuapu la ama zu lilaw ha heih. Zâ vaw châ ta lôkhao liata a rie ei ta, amylâ ta khih lâ azu awpa ama châ hapa vâta ama palôh rietheipa cha ta bie chhao achho khao leipa ei ta, amâ mô haw. My ta kaw thyu ei ta, zâ hro haw ta awkho chy ta aku arirâ tyhpa kha, rirâ khao leipata ama thyu haw, Hly-â palôhpasapa ta he hawhta hla a phi;
“Hlichhypa cha khâpa lôh ma aphao,
Awkho pa- ei a ku vaw rih-râ vei”,tahpata.
Nie leipa ta noh hluhpi ama y hapa vâta ama thazy chhâ kaw ta, nie leipa ta a hro thei awpa ama châ leipa vâta, ngiaroh kawna chô ta khi lâ cha ama zu haw. Khih cha za tlô ei ta, Hly-â nôpawzy cha ta Hly-â cha ama vaw parai haw. Lauchei bei Beisao pahneisa awpa ta, o liata khawhlôh haw ei ta, khô papuasa khao veih ei, o liata ama hrai haw.
Zâkha cha Thlachamy zâ châ ta, Hlichhy a chareina lâpi liata Chanô pakha he, Hly-â khiama tahpata, aky liata chabaih ta, cha chanô chata hla ta,
“Hlichhy na patu kha Hly-â va ne,
Vachhi chhidi hlôhlô maonô nei ne”, tahpata.
Khisawzy ta ama pahno khai thlâh hapa vâta Hlichhy chhao ta Hla pyly ta he hawhta a palie hra,
“Vachhi chhidi Hlôhlô maonô hra la,
Hly-â chainah khana doh vaw lao e”, tahpata.
Hlichhy cha apalôh rietheipata aw-via hawhta avia bualuah ngâ nota Chanô pakha ta Hly-â bietapa cha vaw chho ta, he tawhta cha Hlichhy nata Hly-â cha Obâ pyupa tawhta azo lâta ama pakyh thei haw.
Daihti cha sie lymâta Hly-â cha Lauchei bei Beisao lâ akia bâ awpa a châpa vâta, Hlichhy hnohta ‘Lauchei bei lâ akia bâ awpa châ nata nâma chhao chôtlapata vaw sie aw chi ta, Ahlâ ama cha pahlâ ti ta, keima la khâpa hmah khoh vana, Hly-â hnoryna ei khoh, ta ha mah y’ tahta. Akyhpachapa Hlichhy chhao cha paryhsa ha hra ta.
Lauchei bei lâ cha va kiah ei ta, mâ zy ama vaw mâ khai tawhta, Ahlâzy chhao vaw pahlâ lymâ hra ei ta, Hlichhy chhao cha aw hra ei ta, Ahlâ ama pahlâ daihti liata ‘kei la khâpa hmahta khoh vana, Hly-â hnoryna ei khoh’ tah ha ta. Khisaw zy cha ama no-âh kaw ta, Hly-â hnory tlai ta a khopa cha pie ula tah ei ta, Hly-â cha ahnory liata âthyukhei hmosôhpa zydua cha pahly ta Hlichhy cha a pie haw.
Amylâ khih a vaw dei nata khichhai zydua cha ama khi lâ chyu sie ha ei ta, Hlichhy chhao cha Hly-â hnory phaopa ta a sie ha hra. Chavah ama tlô nata ti taina liata Hly-â hnory cha ti paphao tlamaw ha ta, Hlichhy ta he hawhta zawpi hnohta hla ta a chho ei,
“Zaw saw sai aw, tily natohpa la,
Hly-â hnory tita phao tha sa e.”
Zawpi ta he hawhta hlata ama vaw palie heih hra,
“Ravau tlasa tily toh thei ma pi,
Hly-â hnory tita phao hrasa la,” tahpata.
Hlichhy ta Hla lilaw ta he hawhta ;
“ Hly-â hnory hnory ta kha ula,
Kaorao peichie seikha phu za y e”. tahpata hla ta a chho ei.
Zawpi ta ti cha thlai vaw toh ei ta, Hly-â hnory cha ama lapa haw. Hlichhy cha khih vaw tlô ta, akyhpachâpa Hly-â hnazô hmôpa a y khao leipa vâta noh hluhpi cha olia mâchhie sa pata y ta.
Nohkha cha, Hly-a paw lyuva na liata, Âhmykô lai ngasapa y ta, achia thlâ thei awpa satlia zy pakha pakha ta chho lyma ta, angâ tlâ v’ei, satlia zy ta ‘Hlichhy dei leipa ta la, ama vaw tah lymâ haw, Hly-â paw chata Hlichhy hno ta Âhmychiah thlâ aw pata ngâh leina chôta nata nozapâ kawna chôta chho ta; Hlichhy chhao chata vaw paryhsa ta, ‘keima Thochiah thlâpa kâh nama kho khiatala, ei cha vaw thlâ’pa ei na’ tahta, amylâ ta sie ei ta, Âhmykô cha kiah ta, chiakha pathla ta, Siaramo tô ta, he hawhta hla apasa sa:
“Tei tei ta lâh ta,
Hly-â y na Fangyu râh alâ vei”,tahpata.
Âchiah athlâ khai tawhta machha lâ ta, achiah akawzawhpa liata akaw hli ta, khih lâ akaw sie haw. Hly-a nô nata paw cha, Hlichhy cha thokô thaby liata pati pahâ kawpa nata sa tihâh chhaota a chôpa hâ thlâh ha ei ta, achô thai khao vei tawh cha ama thlazoh kaw ta, he hawhta hla ama phi:
“Hlichhy cha Vâchô luahsa khiah ma,
Bôhpi ry lia beipai ei paih cha la’, tahpata.
Zâlâ noh tla ha ta, Hlichhy cha a za chô khao leipa vâta, Hly-â nô pawzy cha khih lâ kaw sie ei ta, a zota ama kaw tlô.
Lyu cha rao ei ta, Hly-â nata âvahpa chhao Mara hrozie hawhta sipalie awpata Hly-â nah khi lâ cha vaw tlô ei ta, nohkha, nohno amâ pahâ tawhta, chicheih awpa ta Hly-â chhao cha lyulâ sie ha hra ta, lyu atlô tawhta akyhpachâpa ta thochiah athlâpa cha mohta âsâh tah ngâsata, he hawhta hla aphi;
“ Ange Hlichhy pawtho kiana Hmylai kô,
Apathli sualuana moh bao ula”,tahpata.
Hly-â cha apalôh alie kaw ta, chitu awpa chhao ta akutha bâhtha chhao tlo thla ta a y no ta, Hlichhy ta he hawhta hla ta a vaw palie;
“Hlichhy pawtho thlao luahna,
Hly-â yna alâ vei Sangua râh “,tahpata.
Hly-â nata âvahpa cha vâro ama châh tawhta Hly-â nôpawzy ta vao thiepa ei ta, khi lâ amâ lie ha heih. Khih ama tlô tawhta Hly-â cha akyhpachâpa Hlichhy nata âvahpa châta Sahria sa ta, a thaisa ngâno ta he hawhta hla a phi;
“Hlichhy pa châ Sahria ai dô ei dô,
Hrâpi thyu sala, hrâta tâh kha se”,tahpata.
A kyhpachapa Hlichhy châta Sahria a sapa cha byhnâ awpata,
“ Charia lâ asiena liata he Sahria he pahniena tokhei mawhsy” a tahna a cha.
“Lauchei bei châta Sahria aidô ei dô,
Hrâpi thyu sala, hrâta tâh khei se”, tahpata.
Âvahpa châta sahria a sapa cha chhie sana hla phi hra ta, a y zie cha “ Hrâ asiena liata he Sahria he vaw thi khei ha mah y” a tahna a châ.
He hawhta thai asa ngâno ta hla a sapa cha anohnô ta a vaw thei nata, ‘cha hla na sapa cha khâpa hla maw? Vaw sa pathi tua’ tahta, anohnô riahchi ta, akyhpachâpa châta hla aphipa kha, âvahpa châta tlao sapata, âvahpa châta hla aphipa kha akyhpachâpa Hlichhy châta asa haw. Anohnô cha ahmeiseihpata khiah ma asa, tahta aly kawna chôta âhnei sai haw.
Nohkha cha Hlichhy ta Hly-ânah khih lâ khi tly awpata Pypi akhu ta, Dua-â apei ta, Chyna poh abupata, Zai-ô phaoh pâ ta, Meithei chhao âpia pâ hra, chahawna chata a kyhpachapa Hly-â ynah khih lâ a sie haw. He no heta Hly-â chhao cha hawka lâ Vaolao hryh awpa ta vaw sie hra ta, Dawkia chy kawpa vaw phao ta, chysia chhiekharupa a tao ta, hawka liata amâ tyh haw, Hly-â cha anoza kaw ta, he hawhta hla a phi;
“Hlichhy ta Khithlao a vaw chakai,
Keima deina Lôdao liata” tahpata.
Hlichhy cha khih liana chata a tao awpazy atao khai tawhta, ama khih lâ cha a vaw lie ha hei ta, ama khih mo ta Hlichhy ataozie ama pahno thlâh’pa vâta ama ngia vaw chhie kaw ta, he hawhta hla ama vaw phi;
“Hlichhy cha Kabâ tlâh lâ azu,
Sâhthlao sahma lâchho to dy ei si”, tahpata.
Eikha cha Hlichhy ta Hly-â hnory liata hmosôhpa a ypazy cha Hlobyhpi lâ sie kheita, Sei hluhpi nata kaw ri ta, Sei cha aza hao lymâ haw. Lâpi liata Hly-â nôpaw cha vaw sie ngâ ei ta, Hlichhy ta a kei hmô nata he hawhta hla ta a chho ei,
“Hly-â nôpaw lapi kia za y kha,
Hlichhy ru tlaitly hma chadai ri le” tahpata. Hly-â nôpawzy cha ama noza ngâsâ ta, Hlichhy thâtih reipa ta lyu cha ama tlô.
Nohkha cha, Hlichhy cha Hly-â nah khih lâ khi va tly heihta, khih tlôchyta Hly-â cha a sawzy nata lâpi kiah liata lyurâ bia vaw chao ngâ ei ta, Hly-â cha biakhao liata bia chao ngâta, asaw nah cha lâpi liata pa ysa ta, Hlichhy ta a hmô nata angiachhie kaw ta, alâchao cha pachhi ta, Hly â sawnah cha pie ta, ano cha asie haw. Asaw nah lao ama nie ngâpa a pahno nata Hly-â chata ‘ahyma lâchao châ pie ei’ tahpata hiahri ta? Asaw nahta ‘Khichhaipa Meithei âpupa na niah apie’ tah ei ta, Hly-â cha pachâ ta, Hlichhy a châ nata khâchâ pangiasa ta, he hawhta hla aphi;
“Hlichhy lia saliah ei vao tah mawh sala,
Hrôpi asyhta, Meithei apiapa khâ e,
Lauchei beisaopa liata saliah ei vao he la,
Piahlâ lâta sawpâh phaoh e”. tahpata.
Hly-â nah khih he chakâh kaw ei ta, râh bia nata Bakô, Chhâchhao niepata ahrohpa châ ei ta, chavâta nohcharei ta Hly-â nata asaw nahzy cha râh la bia chhia awpata ama sie tyh.
Nohkha cha Hlichhy râh âkhiena liata khichha lâ tawhta hrâsie penawh nata atyh ei ta, ama sie n’awpazy ahriahri ei ta, khichha hrâsie penawh cha Hly-â yna khih chho awpata azâ siepa tlao ama châ. Hlichhy cha angia âryh thai khao leipa vâta ama hnoh sie hr’aw pata hiah ta, âmo chhaota ama paryhsa hra. Hlichhy cha hmo yzie apahno viapa a châpa vâta hmiapasa ei ta, Hlichhy pangiasapa hawh tlai ta, khih tlô chyta Hly â cha hawka liata vaolao vaw hry heih ta, Hlichhy ta Hly-â a hmô nata pahi pata aw ta, thei leipata, lôchapota vaw heih ta pahno heih leipa ta, thopahrei ta vawh heih ta pahno heih vei, cha nota hrâsie penawhta Hlichhy ky lâ tawhta Lita Hly-â cha ama vaw ka sao haw. Hlichhy cha thlai arâ hnaoh ta, Hly-â cha apyh ta he hawhta Chaphô a tu.
1. “Pahipata cha aw nata,
Sopavawna nata chi,
Lôchapo ta cha vawh nata,
Chahrawh lôna nata chi,
Thopahrei ta cha vawh nata,
Mathyu- pahreina nata chi”.
2. “Nari napathla bao chala,
Lâsawna zâzawh e,
Pori cha thythlu aw sahla,
Vano y a khia ma”,
3. “Tho mawsala, Nari nama,
Beisaw atuh vykaotho,
Nga mawsala,nari nama,
Tili ngasâsei y”, tahpata a thata a chakhei.
He hlazy he Hlichhy nata Hly-â kyh amâ pachâna, amâ vâ-iana hla nata amâ ti theileina hla châta, ao no-eih ahneipa sai achâ.
Satlia nata Laisa vâ-iana liata sa tyhpa sai a châ. Azao hla sa ei ta, ama palôh liahsa âlie nata Hlichhy nata Hly-â hla ama pazao.
