Introduction to Life and Social contribution of J.Vialua
K. Pari
Art & Culture Officer
&
Secretary
Mara Art & Culture Committee
Mara Autonomous District Council,
Siaha.
‘Marâ Awsi’ ‘A lo thei leipa J. Vialua’ tahpa ta ama bi tyhpa Puhpa J. Vialua (L) he a hro chhôh ta chyhsa ia-lia thâwhliapa a châpa vâta a sôhna hawhta pasô thai tlâ leipa pi ta, ano ta hla ta â phipâ ngâpa hawhta, moto ta eima mona dâh he chyhsa hmeiseihpa hawhta moh tlâ leipa pi ta, Stage liata a kaw luah ta hla a sapa chhao ta a pôhpa hmôpâ pata a ao theipa hlâta, a pôhpa hmô leipa ta a ao eima theipa heta pasô via pi ta, eima khoh via khiah ma-i! tah awpa ta â lâ.
Ano deikua cha 29th June ’09. ta a thipa thâ eima theipa nata Marâ Leilô cha chalyu ta, moto palôh daih ta, miah a chanaoh.
Atakô March thlâpâ liata Shilong lâ zu nata, ei kaw sie chy ta, ei saw chanô Sylvia tlai cha, a thi awpa he a pahno chhielie khiahma tah awpa ta “Einâ, Pawpaw halelui Paw zy he Marâpa châta chyhsa rôhnapa châ ta, khâpa hmahta tao theipa hnei mapi, na pasôzie palâsa nawpa ta rao-ao (neck-tie) tazy phaopa la, na tlô nata na room liata thopi do hrua chi ta, hmo di ta ei cha pasôna palâsa nawpa ta he he ei chaw phaopa tah la, âly va dâh la e” na tah ta, châhrasala, ei sie chyhta ei bua pâ vâna, he hawh nôchâ ei rao leipa na, pahruana a taopa hlao ei patloh thei leipa a thin oh heta ei palôh a hiah. A thipa ma nâ daih via ma, he hmo pahruana hlao ei patloh leipa he ma, ei na daih rai-riepa ta ei pahno.
Hâleluipaw Sôna pachha/thao papua awpa ta a hrona he â vaw ngiah tlai khia maw tah awpa ta “a chhâ hana” tahpa bie â vaw khie pa tawna ta no-âpa nata bieruapa ma bie hmeiseihpa tahpa palôh liata â tu ha ta vaw hiahhri pasia lai nata cha “Halelui paw y khao vei” tahpa vaw châ tlai ta, vaihto tawhta Hâleluipaw Olâ taokheina nata i-na palâsana pawpi chaba chyupa ta ama ngai chili. Ari y no chala Hâlelui Paw O cha ‘Pawpi O’ tahpa ta eima bi thei aw. Moto ta eima i-na cha Pawpi ta a phuahluah. Chyhsa hluhpi cha pakah palei thai hra leipa pi ta, daihti y hra vei.
34th Freshers Social, MSO. Aizawl cha 3rd Oct.’09 ta hmâ ei ta, he liata Aizawl MSO ta khokheina ei na patosapa hawhta, khichhai zachhihpa (Quest of Honour) ta a kei hlao nata he Programme he Puhpa J. Vialua (L) châta hlâpa (dedicate) châ ta, a saw chanô J. Ruby Marâ Idol chhao â vaw hlao hra. He noh heta a nohthlapa Poster ta taopa ta Stage pâchhôh liata tawh ei ta, a hla phipa saita sapa châ ta, a sawchanô cha hla sa patlô thei vei. Aizawl MSO chhao palôh ama vaw hnei kaw. Marâ Lôsôhpa cha a vaw thy chakhy hra v’ei.
Marâ hlasa thai py (MHP) pachhuah panohpa ta Puhpa J. Vialua (L) Tribute Concert’ 29th nata 30th Oct. ’09 zâ ta eima hmâh hra. MHP chhochhi cha pôhpa pachiahpa peimawh chaipa a-ei/tlopa cha a tao ngâsâ. A sôhna cha â kaw lâ via lymâ aw. Leilô â duah chhôh cha, chhâ a vaw y lymâ awpa liata chhao a moh he Marâpazy hry liata la, dia beih thlyu aw vei.
Tahmâ Art & Culture Department pachhuah panohpa ta hla nata bie, a thâtih a chuna (Seminar) hnei awpa ta eimâ chhuahna hlao patlohsa tuhpa MC. Thâsia T. Azyu, Rev. NC. Vâbeilua, MC. K.H. Beithie nata K/M Pâchi Hlychho a thâtih nata a hla nata bie a pha kawpa ta â chhuahnohtuhpazy hnohta alyna bie ei hlâ.
He hawhta marâpa saw talent a hnei phapa, marâ chi nata pho thapasa ta, hla nata bie ta Marâpa râh châta palôh a vaw hryuhpa, Hâlelui Paw he, he hawhta a chhâ ha awpa he, pasai ngâsâ mapi. A pôhpa nata thlahpa eima hnohta y khao vei hrasala, a thâtih chhâ he Marâpa chi nata pho thâtih, chhaichhi hmobaoh y pakhyna Art & Culture Department, MADC liata a hlao hrasala tahpa kho kaw pi ta, he seminar he eima pachhuah panohpa a châ. Eima khona Abeipa ta hlao miah patlohpa vâta ei ly ngâsâ.
27th August ’08. Noh ta Art & Culture Officer Post liata a vaw tyu nata, eima chi nata pho, ti nata râh châta hria thei awpa ta Abeipa baona hiapa ta thlahchhâna chôta ei room cha ei pahrâ. Abeipa ta ei khona nata ei thlahchhâna chyh-ei ta marâ Art & Culture Committee thlai padua theipa a châ. He Committee ta bie a pathlupa cha hmah la pazi thei lymâ awpa ta a pachhuah panohpa châ ta, Abeipa ta miah chhihtha lymâ ta, sô chyhta hmâpa ta hlao miah a patlohsa lymâ.
5th March he Lyuva Khutla cha-y nawpa ta MADC Holiday list liata 2009 pa tawhta pahlaopa châ ta, 3th March ’09 pa ta “Marâ Thyutôna nata a pahlypazy” tahpa bie hmâpa ta seminar hlaotloh kawpa ta hmâpa a châ hra. 5th March ’09 nota Lyuva Khutla rôhna kawpa ta hmâpa a châ hra.
He noh eimâ hmâna liata a thapaw chaipa nata â ly chaipa cha Halelui paw he châ khiah maw I, ei tah. Marâ chi nata pho, tha a vaw pasa ngâsâ. Apiepâ zie châ leipa ta, a hla nata bie, a palôh heta ei rai liata thapi phia via awpa ta a byuhna zie a thi tawhna heta tha tlaita no eina pavâh. MCHP President châna nata Art & Culture Officer châna ei pakaohpa heta Marâpasaw zy châta raihria thei awpa duahmo liata ei duahpa vâta Abeipa liata alyna bie khâ ei rei tyh.
He seminar heta Marâpa sawzy chi nata pho a bohna nata tha pasana kyh liata Ti nata râh châta chyhsa phahnaipazy talent a hnei phapa nata palyuhpali â phuhpazy palyuhpalina nata pasôna kyh liata maniah papôhkhasa sala, thei phapa papua tlai mawh sy.
