C.Thahe
Mara chi nata pho he Chin group liata a uthei via chaipa eima cha.Achha pa cha Kachin nata Chin phopa liata uchanaw pano liata a uthei viapa he Mara a cha.Burma Encyclopedia liata cha Maran tapata rohpa vaw chata,keimo Mara mo deikua cha eima reih kah liata consonant ta eima rei eima pachha leipa vata Mara tapa ta eima vaw reipa acha.
Mara he Kachin pho liata nata Naga pho liata zy ama vaw y chili.Mara pathla zy hmaokha ta eima y pakhy na su deikua cha,Myanmar rah lia nata Mara Autonomous District council Area ,Lai,Chakma Autonomous District council Area nata Mizoram Su thokha liata eima vaw y pakhy.
Ahmiatuata Chin group liata y pita China rah tawhta eima vawpua laihna he eima theina rahkhata eima vaw lai chadai tua aw.
Chin mo pho he,cha eima vaw hnei leipa vata,eima thyu tona eima vaw pua laihna thatih pahno aru kaw.Christian Missionary zy eima ra ama vaw ngia tawhta, Cha avaw ro thaipa zy eima cha pavata, cha eima hneina tawhta alai chadai pata ko 100 rachho ngala acha.AD ko1000 hlata China(Mara) thati he pahno aru kaw.Tibeto-Burman eima cha pavata,Burma rah liata eima y na daihti he chysa hropa zyta mania ama rohpahe eima pahno theihchhoh pa a vaw cha.
Tibeto-Burman pathla Chapi ta China rah tawhta a vawpasie laihpa ama cha.China History parohpa eima laichadai nota 221 BC-24 AD taihta China rah liana he Chins pho he vaw y eita Chins abeina rah(Chin Dynasty) he Hans mo phota ama vaw pahnie hawpa vata China rah notla la ama vaw pasi haw.Historians thokha reidah ta cha Ch’in,Ch’u,Chein,Chiang,
Chin tahpata mo ama vaw bie.Kaneth Scott Latourettle roh dahta cha a cho liata palasa pa mozy khi group sakhapa ama cha avawta.Burma historians zyta Chin he a aoki a sah pata aw eita Chiang he a ao ahnai pata ama aw.Chiang nata Chin he phokhapa ama cha.Professor Tantun ta Kalia Magazine liata a roh dah ta cha Chiang phozy he China rah Szechuan Province liata vaw y eita,ama y na su moh chyuta moh ama vaw bie,chazy cha Yuchshi-Chiang,Wuti-Chiang,Kunghan-chiang tahpazy vaw cha eita,Yuchshi-Chiang na he atahmata Naga phozy he vaw cha eita,Wuti-Chiang phozy cha Tet-Kadu(Manipur/Meitei)penaw he cha eita Kachin nata Chin phozy he Kungha-Chiang zy ama avaw cha.Ahmiatua ta eima reih chipa hawta Mara cha Kachin unawhpa acha pa vata Kungha-Chiang group eima cha ta theipa acha.China rah tawhta Burma rah liata avaw pasie eita Burma rah lia he AD-939 rachhota Kale-Kabaw liata eima vaw pahra haw.Mr.Grant Brown,an,I.C.S.,upper Chindwin Gazzetteer,liata aroh dah liata A.D.939 liata Burma rah Yesakyu(Zisachu) khi he Manipur nata Chins mo phota vaw sie hnao eita ama vaw pahnie haw.Chavata AD 967 liata Kalemyo khih he Chin mopho (Chieftown)abei khita Kale-Kabaw rah liata avaw cha haw.
Atahma Burma rah Sagaing-Division liata ama khih pipa Sagaing khi a lia pahlo(Centre Sagaing-City) Khi Burma mota Chinsu Yatkuat ta eita a y zie cha Chin na ama pahmaona su acha.Atano taihta Chinsu Yatkuat tahpata moh ama vaw bie thla chy.AD.800-900 likaw lia he Sagaing rah chho liata vaw pahra eita,ama hry liata Burma phozy he ama vaw pahlao lai hrapa vata,Burma phozy he cha, poh via lyma eita,Burma pa pho, cha awhpata or Burma pho lata a palie awhpahe a rairu leipata Burma mohta moh abie ei sala,Burma rei a thai or a chei thai khia ta cha Burma pa pho ama cha thei lyma.Keimo Hlychho,Chozah,Zawtha,Khaila,Khulia,Bohia,Thlyutha,Khaimeichho,Siakhai tata apa chhai laihpa pho eima vaw chapa vata malu eima pona hluna zie a pahlie kawpa vata Burma pho nata ama dyuna daihti liata eima pahnie theilei pavata Sagaing khi puasai pata Chin thokhazy cha Irrawady Chava za sao eita Magwe Division lata ama pasie haw.He zy he Asho Chin eima tahpa zy he amavaw cha.Pykha,Group kha ta Irrawady Chava vaw chakah eita notla lachhah ta Zesakyo(Zisachu) nata SalinChi lata avaw pasie eita,he tawna heta phuwin range,Phuwin rahpatho pa vaw kho pata Kele nata Kabaw liata khi eima vaw sa haw.
Ko zabi 13 na 13 Century liata Burma Beipa Alawngphaya,King of Pagan khi Bei pata a kiapa liata mopho zydua awpakhy ta Kele Kabaw liata a pahra pa Chins zy he awpakhyta ,keimo cha Chin mo phona eima cha a ma vaw tahpa vata Lobo liata Chin tahpata rohpa avaw cha.Pagan khi liata Lobo paroh pazy hry liata Chin tahpa Lobo he atano taihta hmo thei pata a y.He 13 Century rachho taih liana heta Kele Kabaw rachho liata eima hei viasa Chins Group zy nata hmao khata eima vaw y kho.
Kale-Kabaw tawhta Chin hill la ama kaw sie na he su thota(3)eima kaw pa chhai 1 Group cha Run chava za sao laih eita thokha cha Chinuai la ama sie haw.Chinuai la a kia penaw he Tidim nata Paihte zy cha eita,chava a sao penaw he Lusei Group zy ama cha.2 Groups he Ly tla kaw kiah eita, Run chava vaw chakah eita Lailun Lokhao liata avaw chhai eita khi zasa laihpa,Sunthla,Falam,Laizo,Zahau,Zangiat nata Hiakha Thlatla,Fanai,pazy he ama cha.3 Group he Southern part mathi lata tla vaw kho eita Letsa chava kaw saota Aika khi liata akaw pua penaw ,Matu,Azyu pazy he ama vaw cha.
Mara Land liata avaw pahra penaw cha 2 Groups liata a zasiepenaw nata, 3 Group liata a zasie penaw y pakhyna avaw cha.14 Century lia heta Chin Hills liata khi avaw sa eita,Mara rah ama za ngia hlata Sothla,Lezao,Makhai,zy liata khi vaw sa laih eita 15 Century rachho lia he ta Run chava vaw chakah eita Zotlang tawhta Phailen liata khi ama vawsa.Phailen liata khi ama sana daihti lia he Chozah heta khoh avaw cheih haw.Hetawna heta Hiakha la khih avaw sa pazy,Lungzarh liata khi avaw sa pazy,Thlatla liata zy,Zokhua liata zy,Marau liata nata Khuafo liata zy,Sakta lita zy,Buanlung,Aivei,Khuapi, dawng-va nata Leitak,Bungtuah liata nata Aika liata zy he Mara pazy khi vaw y tua na avaw cha.15 Century achha nala chhah heta cha Mara hmiatua chai penaw he Salua Tipo,atahma ta Pala Tipo liana he, khih ama vaw sa haw.
Mara pa Bethlehem cha Salua Tipo he vaw chata, Salua Tipo tawhta a kaw kua penaw he Mara rah tahpata mo eima biechha penaw ama cha.
Zophei or Vytu mo he Mara hmiatua chaipa ama cha.Zyuphei liata Ahnai Zophei nata asah Zophei tahpata a vaw chhai eita,asah Zophei naw he Ahnai Zophei hlata Zyuphei rah liata khi avaw padua tua viapa ama cha.Zyuphei rah liata khi avaw sa tua penaw he,Keirao phozy,Thangia or Thangan phozy,Beihro or Bawihrin phozy Lianbawi(Laibie) pho zy he vaw cha eita ama mapaw zyta ama vaw thyuna he Salua Tipo na a cha ama vaw ta.Dr.Lianhmung Sakhong,Iabao Aibur Beipa Thangan chhohpa ta apaw Sakhong reida einachhohpa acha.Asah Zyuphei khizy cha Leitak,Aibur,Hmawng tlang,Phaikhua,Zabung nata Chawngthia zy ama cha.Chawngthia khi he a kaw chha chaina machha la chaita a y pa khi a cha pavata Chawngthia nata Kuchha lika Limfang liata eima Missionary Pupa R.A.Lorrain ta Lobo akaw bo nasu chhao a cha.
Ahnai Zyuphei he Vytu eima tahpa phozy,Aika liata akaw puapa pho Azyu eima tahpa group lia penaw cha eita,Aika khi tawhta Lungphialia khi kiapa la khi tla ama pasie haw.Ama khi kiapa liata chava he Vuati chava cha ta,Vuati chava tawhta atahma Vawngtu khih avaw sa penaw he,Vytu khih la Azyu rah tawhta a phei lata khih avaw tlapa ama cha pavata Zophei,Zyuphei ta pata ama moh ama bie.Vuati chava tawhta avaw sie pa ama chapa vata Vuati mo ata eita,Vuati tahpa eima vaw awh haw.A-ma khi zy cha,Vytu,Ziphe,Tlyra,Ngala,Hraphia,Khabo,Lytl-a,Iana nata Siata khi zy ama cha.A Bei ama la pachhao Sawthly bei latua eita Hawthaipa ta ama vaw hrietu pava-ta,Leita Beipa Hlawncheu pa he la hei eita,Hawthai Bei nata ama O tai pasa sa eita ama tao thei khao leipa vata ama khih la ama kua sai haw.Atahma ta ama Beipa pho Zawtha pa Albik(A.B) nata Hleilai zy he Hiakha Beipa ta lungzarh liata Chozah zuano Hlei iang Hleiser cho liata asa pa asawchapaw penaw ama kaw la pa ama cha.Vytu rei chhao he ama beino reih,Hekha reih nata ama reih Azyu/Hawthai reihzy pahlao pahlipa reihzy a vaw cha.He vana heta Awkhy pahla chhao he ama reihta ama hneileina chhapa avaw cha.
Lautu mo he keimo ta Kahno mo eima ta penaw, Chhaongai Tlopi liata khi avaw satua penaw cha eita ama Uthei chaipa chhao he Lahnopa acha.Lahno pazy Lysa pazy Keirao pa,Beingia chhohpa zy he Salua Tipo tawhta akaw kua penaw ama cha.Chhaongai Tlopi ama kawngia na daihti he Leita liata O dy dy sari ta khi ama vaw sa haw.He leita liata khi avaw sa penaw he Leita thiehpa pe-naw ama cha.Ama moh cha Sihlai, Sibia,Hminghlui,Ehling,Hling-ia,Tlumang,nata Tluhlawng pazy ama cha.Abeita Fala paipa Thlanrawn beipa a sawchapaw a liahpa Sethang he ala eita,Thangia chho penaw nata ama pary ha tawhta ama sawchapaw ama vaw hneipa he amoh ta,alai pa nata alaipa eima pahly haw,chariahnei khao mapi ta pata Laihlyh tahpata moh vaw sa eita a pathla zy cha Laihlyh chho ama vawta haw.Chhao ngai Tlopi liata khih akaw padua penaw chhao heta Leita mo liata ko khata vaohly (Vaotaw)Sakha cheipata khih ama sa.Chhaongai Tlopi tawhta Teisai,Saito,Hnaro,Khihra,Tha-au,Awsa,leipi,leika,Sawta,Hraipi, Lytha tla,Zaoma,Chapy,Potia(A)nata La-u khi zy he Lahno zuana Pino.Mai cha sawchapawpa Zawkhai pathla zyta khi ama vaw tla lai pa acha.Ama pho moh he ama rah moh bie pata Chhachhai ama avaw tah.
Mara sikhua atah penaw he sawhmo tla chaby liata khih vaw sa eita Beino chava mathi la chaita a y pa,Boly liata khi asa penaw he Tlosai mo ama cha,Atahmata Tlosai nata Siaha mozy he ama cha.Ama beitua chai pahe Azyupa Liahrai chata,Hnaro beipa Matha Chhachhai ta zasi hnaota,zapatu ta a khi la ama chhi hawpa a cha.Ngiadi lano 12 feet a seihpa chhaono/tyno nata Chaawpa Seihpino ta ama kaw chatlai pa a cha.Hnaro khi he phu la awhpata Tlari khipa Hlychhohpa Iakhai akaw la eita,Iakhai he naino ngasa ta,Hnaro asihnao thei awpa acha leipa vata ano hlata achhyuhra viapa Laichi Hlychho he ama kaw la chaneipa acha.Laichi he Thangzang beipa saw chysa riapha moh pathapa acha.Thangzang tawta Litho pa nata Tluma pa apahruata Tlosai khi machhala atahma ta Khabo,Khabo Lytla,Ngala nata Ziphia zy ama rina lytla lia khie ta khih aza padua.Atano taih heta Laichi khirao tapata asu hmo theih pata a y.He khi lia heta Tlosai mota abeita ama kaw lapa acha.Tlosai dy 60 ama cha nota Hnaro he O dy 100 ama cha hapa vata pahnie ama nga leipa vata khihropa khi laiviapa ralai viapa padua ta charia chhaichhi tluavia awpata Beino chava za chakah pa ama cha.Laichi pathla zy he khi chha Hlychho ata eita,Iakhai pathla zy heMara Hlychho ama vawta hra.He no liana he Matha Sava or Tlasah liata hla vaw phi ta.Laikhai khupangawna nahnie ei. Noh nohkha cha Seihcheih hmiaai asa lavapi avawta.
Lochei nata,Hawthai he Sothla la tawhta avaw siepa ama cha.Mara rah liata Lochei he khi 3 y eita,Hiakha pai nata Sothla rah liata chhao Lochei he khitho a y hra.Amo ta cha lungchawi ama ta.Ama khi moh zy taw chhaota So-thla la tawh ta a zasie penaw ama chazi asia ngai ta kaw. Lochei he a u thei pa saw chata,Hawthai he a seihnaipa a cha.Hawthai beina he Sothla bei Zangiat pathla cha eita,a hmiatuata a lapino liata a sa pa he Nuhrim ta eita,Mara reih ta Nohro he chata,alapino a hiatlia viano liata a sa pa he Nuhnua ta eita Notlia tana a cha.Lochei bei naw he Zawro,Khaibei nata Aubie zy he ama cha.Chhaongai pa ama thie tlamaw pavata,Chhaongai bei,Chhachhai pa abeita ama la haw.Nohro Beipa Sobei cha ta Lochei Beizua no Hlyngai chhao Lochei nata Hawthai a dy ry nawh pata a hnei ta raw eita Lochei Beina Sasu phei ama sitano Hlyngai ama zapapiesa tuhpa ama Seicha pawpa he Sobeita a sieta cha khao sao ta a thie haw.Moh akaw Chhuata Apaw chosu tlomah vana ata pavata,Hlyngai he a hnorah thlia ta,Sobei Ochho phina ta hma ta,Laisie la,Hnei siela,Hmoto puala,tata Basa Kotai Ophita Lochei la asie haw.He vana heta Lochei nata Hawthai a dy ryna y theivei.Hawthai he charia hnei ta,achakah pavata,Lochei ta bie achho,einawta y charei ka thei khao vana ta pata Beino he chakah thlama y tata,Beino chaka pata Siata rah Phakao liata khih aza tla.Siata rah liata chhao ama chakah nota Hnarota za si hnaota No aotla la ama pai haw.Lochei cha atano taita Burma Mara rah liata khitho ta ama y thla haw.
Atahmata Ngiaphia nata Locheita (pikho) likaw lia khi Hlaipao khih a y.Hlaipao khih he Thlyutha nataBohia khih acha.Hlaipao mo he Khazohpa sano ama hnei.Uach-ua(Aechae) nataDaphe lo he ama khazohpa a cha.Hnatla nata Sa nata nga apie tuhpa he Uachua khazohpa chata.Sah nata nibaw apieh tuhpa he Daphe lo a cha.Amako zy avei tu khaolei pavata Sei thiepata Daphe lo he ama bao.A y zie cha Daphe lo he uasa khaoleipa eita,pathaisa khaoleipa eita Hati penaw zyta ama iethlu khaipa vata a palo atla leipa vata ko a veithaikhao leina chhapa nata nibaw a hryu na chhapa hawhta, ama pacha pa vata Sei ama thie thlupa cha.Thla a chhatuhpa,Chao a chha tuhpata Thla a chhano ta Daphe lo he hmia pasa leipata hno pachha pata thla a chha haw,he haw heta.”A khi Aechae,Daphe lo kao,Daphe Lo aw,Chaihkhai napa thla bao mawla”.Chaihkhai na pathlala,Daphe lo aw,Seichei khawhri chalua hnaonei”.He vana heta Daphe lo he a palotla leipata Saluatlanala a hlua haw.Chysa 30ta a chadai eita,Salua tlana liata ama zahmo.Daphe lo a chadai penaw heta rah phapa zahmo lai eita Hlaipao khithie ama zoh haw.Hlaipao khithie cha Bohianata ama bei.Hlaipao khi paropa cha Thlyutha beita a bei eita amosai ta khi sa ama nga khaolei pa vata Chozah bei,Nahlie a beita,ama la haw.Hlaipao khi paro mo cha atahmata Chakhei eima tapa Satly khih khi acha.Hlaipao khithie deikua cha Zyhno nata Laki/Khopai Mipu nata Lopu khih zy ama cha.
Lialai Heima mo he Sawhmei tla mathi la atahma ta Lia-lai rah khih lia khita vaw y tua eita,ama tikhao zy he Chhachhai beipa Beihra vawpa rei sa eita.Hiakha thlatla liata Chozah nata Zawtha ama vaw bei tawhta,chariata ama za sie hnao tyhpa vata ama khih beipa Tlohra he a sahaw nity pa a pheipi tawhta apalaih la asy sala.Sah bai kha tawhta raihmo la asy awh pata rei pasao eita a kholei pa vata Mithlaotla liata Meisako Ngithlu eita a kawpa tuno ta Meisako ta zaphy ta a thi haw.Asietano Hlieso chhao he areilei pata Sokhao pa riahpawpa ta zasie hnao eita ama patu haw.Ama khi la ama chhi haw pa vata Sizo Ngiaphia beipa Zatha Chozah ta kaw cha daita Hlieso apa tutuhpa Sokhao pa he a kala liata a sieta chakhao ta Hlieso he Lialai la aza tlo khei haw.Lialai mo he avaw ly ngasa eita Zatha Chozah hnohta Lialai bei awhpa amala haw.Zatha Chozah ta keima he Sizo Ngiaphia liata eipaw ryu ei uta hnota ala ba awh pa ei cha,chavata keima he avy thailei pa aw nata,ei saw chapawpa pa pali liana heta nama ria a khy chaipa he Lapino a hnei nata nama vaw la awh a ta ei,Sahaw nata Sabai chhao ama pahlo pa haw..Zatha Chozah he a uta penawta i si eita Machhie zuano sawta eima pina rah eima mapaw rah he ryu a toh thei awhpa chavei tahpata ama sei nazy pasyu pata ama pathie sa haw.Zatha Chozah sawnaw he ama paw nata Sangia akhai pa,Sathi ama pari pa,Viadikhu ama thlei pa,Awpathi ama pachhaipa Ngunkhar Chinzah,Thlatla beipa la phula awh pata ama sie haw pavata,Thlatla charia chita Beino chakah pata atahma la Lialaipi khih la ama pasie haw.Biehra ta hla phita,Lelai thie khai tha sala,Cheirie Tlahnie zae aw “A Haparie Hlieso die pahlo sala”.Lelai chhie chahlo nata Eifeivawnei Hraithlao chhievaw no na a varaolao.Zatha phuh ma zala khiacha,ama khichheipa zy dua ama boh nata ama pangiasa leipa vata,Charia avaw thyu awhpa ama ngiarohpa vata Beino chakah pata atahmata ama y na rah la ama sie haw.Ngiaphia Sizo mo nata Chapi mo he Abei Phokha,reika ka kha ta khih sano Sawhmeitla nochhi nata notlata a y pa ama cha.
Sawhmotla nata a pazao pa Locheih tla Notla lachha ta Chapi khih y ta Sawhmo tla Nochhila la chhahta Ngiaphia khih a y.
Chapi khih he Solo pa phao ta khih ama padua pa a cha.Chapi khih a padua tuhpa Chapi he a saw pano sata ama moh cha Thaipa nata Khipa ama cha.Abeita Hlychho pa Thlu lao he ama la.Thlulao he Hlaipao beipa Chhohma sietano lapi ta ahnei.Thaipa lapino he Ngaihlo khithie zuana a cha.Thaipa Solo a thi tawhta a sawnaw Letei nata Thatei he ama hro rie a pathei sa ngasa.No kha cha atu,tukao he Ngaihlo Baiba liata a paru ta a kaw paso sa ei.Eitu kao na a lei haw,a hyma a paru tah pata tla pa awh sata a khi sawmo a pa tluasa ei.Ama hmo theilei pavata,Ngaihlo baiba kaw pahy te u tahta kaw pahy eita Baiba chhoh liata Tukao cha ama kaw hmo.Eitu kao nama paru tah pata ru a bai ei.
No kha cha Letei nata Thatei he Thlulao Sei sawchapawpa pakha nata chava la nga patu awh pata ama sie,chava ama tlo nata Ti ama tla hla ta ama hnei chhaichhi zy so khai awh pata rei eita,Thatei nata Letei he Chhisa amohta Khieti nata Zohrai cha ama ao chyu.He ama pachhi he pahlu eita Nga patu nala ama zu haw.Ama vaw dina daita liata ama pachhi he hmothei khao vei.Vaw chalai lyma eita O la ama vaw tlo.Hmo y zie ama no hnoh ta avaw chho nata ama nota ama beipa Thlulao hnoh ta chyei ava chho.Thlulao ta khi saw mo hnohta va chho pachhua ta,tla aw eita,myla ta pachhi Khihti nata Zohrai tlua awhpata apa aw sa ei.Pachhi tlua awhpata apua penaw hnohta he hawh heta reita,Nochho hlata nama hmo khiata cha Thatei nata Letei y cha awhta, Noh a kia rasa ta nama hmo khiata cha keima eih a cha awh a ta ei.A khipita pachhi cha tlua eita myta hmo thei leipa eita,Zala noh a kia rah sata pachhi cha a Seichapawpa ta a lo ry liata a vaw hmo.A bie taihpa hawhta pachhizy cha a nota ala haw.
Ngaihlo he ta a rilahpa Laichheih khithie hnota nazahmo tuala,eima beipa mania a tao da he a pasa kaw ata pavata Laichheih cha a viasa pa nata Chapi la a zahmo awh pata ama vaw sie nota Thlulao nata a viasa pa ta Locheih tlah liata ama vaw byu haw.Lapi kia liata sihnapa phai phai phao a khu eita ama ha thla haw.Ama vadua ngyuta Laichheih nata aviasapa ama zatlo na daihti liata ziza kaw pa thlie ta phai phai phao cha kaw hy khai ta ama vaw la haw.Laichheih ta zahmo eita lita zaka eita ama rah sai haw.Chapi khi a tla tuh penaw nata ama beipa amah mo thai leina he a lai via nga kaw pata ama pahno.
He daihti rachhoh lia he Thlulao heta Tlaripa a pahruata Hlaipao mo Hawti naw ama zi beipa Chhohma Thlyutha nata Lyurie ama ha nota Hlaipao mo hatizy he lita,kasao khai eita ama thi parita, a hlua thlapa apuhpa Chhohma he hmo ta ei puhpa navaw thi thla ha ma? avaw ta.Chhohma he vaw pahno thla hata kheita rai chasala,khi nopazy dua awh pakhy ta khatai charia ma nathie tly tahpata a awh pakhy ei.Chapi bei Thlulao chhao he avaw hlao hra ta,Chapi mohta Sahma a do nota ama thie haw.A sawchapawpa chhao ama thiepa haw.He noh tawhta Ngiaphia Sizo la ama puhpa Laichheih khithie ta ama khih la a kaw paly ha ei.Thatei nata Letei he ama palo zy ahaw via na daihti liata Fachhai beipa Nahlo sawchapawpa Beichai he a beita kawla pata,Beichai nata Cheikhu azu eita Chapi khih he ama za padua heihpa a cha.
Beichai Fachhai he chano chhano palo ta sawchapaw asa thei maleipa vata Chapi khih sawta pacha eita,Thlatla nata Hiakha bei,Chozah nata Zawtha he a bei laivia pata la eisi,charia tawh ta ama boh nawpata ta eita,Beichai hnohta,Apheipi tawhta a palaih la,Sah baikha tawhta raihmo na nie aw,na O a pih atlu laki ta khih pita nohkha eima cha chyh awh ama tah.Ano ary a ta kheipa hawta,Chozah beima,Zawtha beima a beilai via pata la awhpa a pachia eita a hluvia khoh data Chozah bei Ekhai sawchapawpa Napho he abeita ama la.Napho sitano he Zachei Zawtha pata hiata sawpano Zahai nata anawta asa ei.Napho avaw thi nata Zachei he abei awh pata a pabuaba ngathla pavata Chapi Fachhai nawhta ama puhpa Tlachhapa Chawngthia beipa Chapi khi zatly awh pata bie ama kaw ta.Tlachha pa Chapi aza tly tawhta hmo y zi he Hiakha la a puhpa Zawtha bei pahnohta vawta Chapi khih parao lei awhpa,Zawtha pa Zachei ama saw deikuahe, Chapi khih tawhta pasie papua awh pata ava chho ei.Hiakha lainy ta a saw cha bie zatah ta a khy kho khaolei pavata Hiakha Lainy ta Chapi mo hnoh ta khih a pasisai awh pata bie a zata pavata Chyhu khih la a pasie eita,cha khai tawhta Beino za chakah pata atahmata ama y napa khih lia khi ama za sie haw.
Sizo Ngiaphia khih he Sawhmeitla liata khih a y pa a cha.AD 1550-1650 likaw liata Laichheih khithie,Fathlai Khaimeichho nata Khaitei Khulia pa zy ta ama vaw padua pa a cha.Arei lei pata Mahli Chozah he abeita la eita Mahli tawta a pathla zy he keima sawchapawpa taita chha 12 na a cha.Mara pa khih hry liata cha Sizo Ngiaphia khih puapa he ama hlu chai nata pangia sapa a cha.Ngiaphia khih tawhta a puapa khi 30 avaw y haw.Ngi-aphia khih moh y zi he hehawh heta a cha,Sizo he Lyupi moh chata,Sizo lyu ama tao kota Ngiaphia khi la Hraikhao khih tawhta zapasie pa ama cha,ama khih ry liata lasaw chava zalo ta,lasaw chava he Nga hnei hlu ngasa ta a sao alailei a chhia alai lei pata para sa eita nga hlupi ama patutyh.Cha ao padao eita nga ama patu pahe Bokarao phia thla ta ama rai,hia ama sa ty.Chavata ama khi mo he Sizo Ngaphe vawta eita ko nata nohzy avaw sie lai nata Sizo Ngephe vaw ta laieita Tlosai reita cha Ngiaphia avaw cha haw.Ama beipa Mahli Chozah pathla a chhapangawna liata Zatha Chozah he a unaw penaw ta ama vaw thie haw pavata a sawna Thlatha,Matha,Neitha nata Khaichei zy Thlatla beipa ama paw Zatha nata Sangia a khai pa,Viadi khu a thliepa or a pachhaipa,Sathi ama thlai pa or ama paripa,Awpathi ama pachhai pa Ngunkhar Chinzah hnota sie eita ama paw phu ama za la awhpa vata Ngiaphia he khinohta a pachhai pata ama khirao khi paroh pa puasai eita Ngiaphiata nata Ngiaphiapi ta ama pachhai haw.Sizo Ngiaphia tawhna heta Mara Culture hlupi amahmo papua.A thi la,Sawla,Dawla,Odohpa la nata Chysia rohnapa Chyna poh zy,Tlathopo zy he eima mapaw zyta ama vaw hmo papuana su a cha.Mara pazy duata ama thi tita a thipa khila ama sie tita Halaupakae (Halypakae)he chapia cheingei eita Halypaka chhao Sizo Ngiaphia liata y ta,Sawlakia na by chhao y ta,Marapa pahrana su liata Tla a sah chaipa Sawhmeitla chhao Ngia-phia khilucho liata a y.Ngiaphia khih he khatai charia ta hmata a pahnie thei leipa khih a cha.Hlazy avaw phi eita,chho a bulie Ngephepi 300 aw,kiekao hrai li vale fei zauthahma,leihlaichhialei diasakua dy lei ria availei pata na O dyh 300 khi eima sa thla haw tahna a cha.
Mara hmiatua chai penaw he Lahnopa pho,Lysa-pa pho,Beingia chho,Keirao,Thangai chho,Laibie chho,Biehro pazy he Salua Tipo tawhta a puapa ama cha.He pho zy he Vytu,Zyuphei,Lautu Kahno,Pazy khih a padua tupenaw cha eita,ama thi nohta Tipo pavaw rahpa Awthlara pahe khichho liata avaw zawta avaw tla ty.Macha zy rei dahta cha Salua Tipo tawhta ama puapa vata ama thi nata ama ri he Salua Tipo tawhta ama ri a kaw kia pa acha ama tah.Keima chhaota,Beingai chhohpa puhpa Hithaupaw nata,asaw chano ama thi nohta a kaw zawpa ei mota eihmo.Kahno lautu rah liata Lahno penaw ama thina daihti nata Lysa penaw ama thinohta a kawzaw ty hra ama tah.He vana he ta Lautu,Zyuphei nata Mara zy he Chikha phokha eima chazi a pala sa.Hla paroh chaipa sakha Mara hla hneipita,”Kahno azu Mara a khau,Zao a vau,a tipakhau loka tlau paleta”.A y zi cha machha lata a pahrapa lautupa azu ula,mathila ta Marapazy a khy ula,Azyupa zy a vy ula,Maraland liata atyhpakhy eisi tahna a cha.Mara eima chazi a pahno lei penaw chhao ama pahno thei nawhpata eima chana dohpa Vyhtu/Zyuphei Mara,Kahno/lautu Mara,Tlosai/ Siaha Mara,Lialai/ Heima Mara,Hlaipao/ Zyhno Mara nata Chapi/ Ngiaphia Mara tahpa ta a aw ba ei sila Mara mo he chi pangaw hawta a awh khaolei pa eisila Mara pho he phokha chata rei sarih a cheihpa Mara phopi he Thyutlia pazy ta padua pathi ba suvy.
1.Carey &Tuck :The Chin Hills Vol.1.pg-2
2.Baptist Magazi ne 1851.December Issue P.452
3.Grant Brown;GRE,I.C.S :The upper Chindwin gazetteer Vol.A,P-8
4.China Today No.6.1985,Released by Chinese Embassy,Rangoon.
5.Latourette,Scotte,Kenneth,The Chinese,their History, their culture P-51/54.
6.Tanhtun,Dr. in his Article of the Chiang,Kalia Magazine No.108.February,1994.
7.Mizo chachin,Rev.Liangkhaia.
Thati lapakhyna Macha zy:
1.Chaubi Chozah-Lialai.95 years(L)
2.Haihmo Chozah-Lialai 60 years(L)
3.Mahlie Chozah- Ngiaphiapi 74 years (L)
4.Biechei Chozah-Pahrah 70 years
5.Silao Khithie-Chakhei 80 years(L)
6.Thlawthang Liachhingchhung-Zeiphia 75 years(L)
7.Zakhaw Chhachhai-Meisakotla 80 years (L)
8.Rato Zawtha-Meisakotla 80 years (L)
9.Haoko Chozah-Dawhlei khih 60 years
10.Zamang Phuto
11.Lairi Chhachhai-Lobo 95 years
12.Sikha Fachhai-Chapi 70 years(L)
13.Biehnei Chhachhai-Hraipi 70 years(L).
