Tôkalô khih he Marapa râh khih utheipa zy hry liata â hlao phapa a châ nahta â ngia.Kô 1910- 1930 likawh rachhôh liata khih ama vaw sa pata âlâ. Tôkalô khih ama padua tuana su he Ahmy Saika tlô hlâ, Siasi tlâhpi tlô hlâ, 18th Assm Rifle nah ama vaw yna su liata Khih ama vaw padua tuapata âlâ . Kô 1977 liata Assam Rifle nata Volley Ball a khai n’awpata Ground chao ei ta, thlâ sâkha ama pahy pâ.Chyhsa rureipa nata ama sâ (hair) zy hmô ei ta, chapaw sa chahryna Hrôkei nata Viadaw kha 2-pa nata kha 3-pa sâkha rairie ama thao pâ.
He su liata ama yna daihti Lôbô liata châ ropa hmô awpa a y leipa vâta pahno pasiapa châ vei. Kô 1910 rachhôh châ sala angia kaw.
He tlâh he a sâh kaw ta, Tôkalô chavah hnaw âbana a châ. Ziza zy hluh kaw ta, thlih chhao a ru kaw tyh.
Tôkalô he kha hlâ ta TYMAO khih tahpa châ ta, thokha pahno pasialeipazy cha râty- râmaohpa a châpa vâta ‘Tymao’ tahpata bi pa hawhta pachâna zy ama hnei, châhrasala a do vei. Ei khano 1900 AD rachhôh liata Zyhno khih (Zyhnopi) liata Chôtha Hlychho he ryu vaw reih ta, ano nata a pathla, Hasaw nata Laihlei zy he Zyhno liata ama thi. Ama pathlazy cha Zyhno tawhta Vahia khih parohpa haosa liata khih vaw sa ei ta, ama khih moh cha ‘TYMAO’ a cha. Tymao khih mo he lyutla osana pha viana su zy hnabeiseihpa ta Tôkalô khihrypa Lômasu lakia/Saopahra chavah lâ siena lâkia liata khih ama sa. Laikei khih mo (Laki khih parohpa liata khih a sapa ) ta ‘Tymao mo cha Byma rari la ama paih haw’ tah ei ta, khih hropazy chhao ta Tymao mo tahpa ta pahno ei ta, Tymao khih ama vaw tahpa a cha. Source Viachhâ (l) 1966.
Tôkalô moh a vaw puana chhâ cha, Tôkalô chavah hnaw liata Lôkhao âthu kawpa y ta, ti aza lohpa pyu he Tôkalôpa pyu (thunder) hawhta a pyu paro tyh ta, cha cha khih mo lâ ta vaw phao ta, TÔKALÔ’ ama vaw bi pa a châ.
Tôkalô Machha khihrypa (Assam Rifle yna ) liana heta Chôtha pathlazy cha khih ama vaw sapa ta âlâ, he khih liata ama thi nata pangiasapa a cha. Machha khihrypa ( Assam Rifle-nah yna) tawhta Mathi khihrypa abei Lailo Hlychho (Laichô paw) thlâ Lôbôpa su liata ama za yna daihti he pahno pasiapa cha leipa ta, Awnanopa record tawhta âlâna zie ta cha kô l1920 rachhôh a cha nata ama pangiasa.
Mathi khihrypa lôbôna su liata ama pahrâ nona he ama mohôh thai leipa vâta ma achâ ma , ziza phaleipa vâta ma acha tly, he su liata chyhsa thata ama thi tyh. Hri-ia zy chahra ta, thihna zy a hlu kawpa vata, khih apasiesai awpa pha tah ei ta, khithie su awpa (tahmata Tôkalô) khih he ama kaw moh. Machâ pathô a kaw rie ei ta, awhkhy hlihpa asaipa ama kaw phao, my awhrokho rachhôh ta awhkhypa he a kho ngâ kaw. Machâ sahlao za tlô ei ta, khithie kia n’awpa su cha sichâ phana a tlôkhei nahta ama hnabeiseihna ama tlôkhei. Zawpi chhao a ly ngaitapa ta kô 1937 pa tawhta ohmo zy chhao ama kaw va pathao.
He daihti liana he ta abei ryureituhpa sianôpa y mâh vei ei, L.L.Peter Superintendent of Lushai Hills ,Aizawl liata y ta, mara râh a kaw tly, he daihti liana heta Laty beipa Hrato Hlychho (Sacho Hlychho Paw) ta Tôkalo bei awpa ta L.L.Petter hnohta a vaw hiah .Pity Mongyuhpa ta Saikao beipa Thylai pathla ama y khao ma tahpa ta vaw hiahri ta, nôbeinô chô liat y khao tlâ vei ei, Lailo deikua a y tahpa ta vaw chho ei ta, Lailo he Tôkalô liata abei awpata L.L.Petter bie piepa hawhta abei pata a vaw y haw. Source Chhidô(l).
Khithieh kia lyma ei ta, kôthôna liata phie kia paki ei ta, phie amâ pahmao khai haw ama tah ,he kô August, no 2, 1940 liata Hmaokô Hlychho chhao Tôkalô khih thie ama pahmao khai nata vaw pih pa achâpa vâta ‘HMAOKÔ’ tahpata, Pihno Asônô Zakhu Hlychho manô ta moh a bipa a châ.
Tymao khih parohpa eima manô mapaw zy ta ama kaw puasai tawhta ko 1943 pa liata British pheisaih ama kaw pahrâ. Adyuhpi einona vâta Tôkalô khih ryhpa tlâh bôhpi kô ry liata pheisaih na camp y ta, pheisaih 50 rachhôh ama y.
Tôkalô liata hmo ngiatlâh chapa zy:
1. Tôkalô chhyna o hmiatua chaipa kô 1947 liata pahypa a châ.
2. Vâtia thlahchhâna su a y.
3. Pastor Chhahia thlahchhâna su a ly.
4. Laily thlahchhâna su a y.
5. Panana tlâh a y.
6. Pala Tipo he Tôkalô khih kiapâh liata a y.
7. Arâh chhôh liata Lôkâpa âsâ kawpa, ( watertfall) chhao angia ngaitapata a tla tyhna su Tipakha Lôkâpa nata Siasi lôkâpa chhao a y.
8. Lô khaoh ‘Tâbalâpa Lôkhaoh’ âthu kawpa, azota Tâbalâpa hluh kawpata ama riena a y.
9. Siasi Lôkhao sano angia kawpa a y hra.
Source : Hmaokô Hlychho & L.Paly.
