Ahmiatuata Siaha khih thatih eima rei awpa no ta a khih moh avaw phaona chhâpa eima reih tua aw. Kha hlâ daihti liata cha Siaha râh he thothih, a tu râh châ ta, râhsa hluhpi pahrâna a châ. Râh âkhiepenawh chhao ta râh liata Masiah rureihpa nata hâkâhpi zy ama hmôpa vata ‘Siaha’ tahpa ta khih moh ama vaw bi pâ hapa achâ.
Tlôsaih-Siaha,Tlôsaih – Saikao chi zy cha ama za puana tawhta za sie khoh lyma ei ta, Bykhih ama za tlô nahta amâ chhaihpa acha. Bykhih he Tlosaih chi history liata cha ngiatlâh a cha kawpa a cha. Mara pho liata Mara râh apahra tua chaipa ( first Colonist) chi phao no (2 group) ta ama pachhaihna khih châ ta, Bykhih he atahma ta Tlôsaih khih yna khu a châ. He su tawhna heta Tlosai-Saikao phao cha ama beipa Iakhai -11-na chhihthana ry liata Notla lâta sie laihpa ta Saikao angia ei ta, Iakhai -11 –na heta Khatha sawchanô Saza, Zany sietanô cha lahpinô ta a hneipa a cha. Tlosai-Siaha phao cha Khaotha saw ama beipa Zany, a uhnawhpa Bihmo ta a tyuchakhai laihpa ta he su zy liata ama pahrâ. Chiachi byuh liata y ei ta, chatawhtata Tilei Lôkâh ry liata apasie heih ei ta, Chatawhta Tisôpi khih (Sawtliapazy ta ‘Khihry’ ama tahpa, Siaha khitaw nata Tisopi khih kiapâh liata a ypa acha.)liata a pasie ei ta, Khihry liata ama y nota ama beipa Zany cha thi ta, Zany sawnah-Hmôtlo nata Kikhaw chhithana ry liata Tlôsaih – Siaha chizy cha Sicha, Tlaopi (Saby) zy nta Phaikhih No-ao chavah kiah lia zy ama pahrâ. No-ao tawhta Tlôsaih- Siaha chi cha phao no (2 ) ta a pachhaih ei ta, Beita nata Hleisa liata amâ pasie.Beita liata Kikhaw a bei ta, Hleisa liata Hmotlo â bei. Beita khih he titlao vahtie hnawh Beita chavah haosa liata a ypa a cha. Hleisa cha tahma ta Supply tlahna (Droping Zone) nata Circuit House yna khi a cha. Hleisa tahpa ta ama bi na chhâpa cha Hleisa tho he tlâh liata a hluh kawpa vâta Hleisa khih bipa a cha. Beita tahpa ama bi na chhâpa cha kha hlâta Beih ama beina su a châpa vâta a cha.
Hleisa nata Beita liata khih ama za sana daihti he kô 1875 pata a alaichadaipa châ ta, he he Siaha khih a duana kô ta a pyhpa a cha.
Siaha khih thatih liata hmo peimawhpa ngia tlâh viapa tlâhpipa zy cha :
1. Kô 1891-pa ta Tlôsaih-Siaha nata Tlôsaih-Saikao cha South Lushai Hills British Administration ry liata sopa a cha.
2. Kô 1933-pa liata Local Church Achhyna o hmiatua chaipa cha Siaha khih liata paduapa a cha.
3. Kô 1953 liata Siaha cha P.L. Regional Council khihpi achâ.
4. Kô 1957 liata Mara râh liata k High School hmiatua chaipa cha Siaha liata paduapa a châ.
5. Kô 1971-pa 6th June liata Motor (Jeep) patlôsahpa a châ.
6. Kô 1972 pata Chhimtuipui District khihpi a châ.
7. Kô 1999-pa September ta Siaha District khihpi a cha.
Source : Mc. Thasia T.Azyu.
