Pala khih he khahlâta cha ‘Lôhbana ‘ tahpata ama vaw aw tyhpa a cha. He moh a vaw phaona chhapa cha âthaona liata he he khih moh cha leipata, tlâh moh châ ta, chyhsa ta ‘Lôhbana khih’ tahpa ta ama aw tyhpa he a do vei.Lôbana khih tahpa a vaw puana dah cha hehawhta a châ. Khahlâta cha India rah lâ hlâta Burma lâ khitlyh nao via ta, alôh nata hmo peimawhpa hropa hluhpi Burma lâ sai ta tlao ama la tyh. Atahma hawhta siena lathlôh zy a pha leipa vâta khih likawh sie daihti zy ryu kaw ta, Chavâta lâpi lâlaopa liata a rie awpa zy chhao ama pachy kaw hra. Atahma tah Pala khirypa eima tahpa zy chhao he zakhano daihti liata khitlyhpa zy amâ rie tyhna su a cha. Ama riena su liana chata thochiah liata ama lôh phaopa ama ba (bangieh ) tyh. Laivu Hlychho ta khihchâ a zona su cha khitlyhpa zy tah alôh ama baina tyhpa su a châpa vâta ‘Lôhbana’ tahpa ta vaw aw tyh ei ta, (Mizo zy ta Lôhbana tahpa ama aw thai leipa vâta ‘Lawngban’ tahpata tlao ama vaw aw tyhpa a cha) He vâna heta atanoh taihta Pala khih he Lawngban tahpa ta Mizo nawh zy ta cha ama pahno viana dah a châ.
Pala tahpa moh a vaw puana chhâpa
Pala khih he Mara râh notla lâ liata khih a y tuachaipa nata hlôchaipa tah sila rei chhei ma pi. Palakhihmoh ama vaw bi chhâpa cha, Kô 1880-pa rachhôh ta abei Laivu ta Saikao beipa tawhta ochâ chô awpata a khihsaw thokha zy a chhipata khih puasai ei ta, atahma tah Laty râh liana heta ama vaw y tua. He su he Pohbaina tlâh a cha. Cha liana cha khih hmo, râh hmozy ama ngia âryh tu leipa vâta kô hluhpi y leipa ei ta, ama pasiesai lilaw ha heih. He su liana he kô 5 rachhôh ama y thlyu aw, ama hniehnô hmô awpa hluh tu vei. Chatawhna chata atahma tah Pala râh he a ngia ei ta, Lôhbana tlâh liata ama vaw y. Lôhbana he khih mo châ leipata, tlâh mo tlao a châ, he tlâh moh ama vaw bi chhâpa he matu atlyh p’enawh ta alôh ama phao khai thei khao leipa ama bangiena su vaw châ ta, chavâta ‘lôhbana tlâh’ tahpa a vaw châ. He Lôhbana tlâh he abeipa Laivu nata a khihsaw thokhazy amâ za ngia no ta khih moh hnei mâh vei. Abeipa nata akhisawzy cha ama pahrâ n’awpa khih hmo cha moh ei ta, pha ama vaw tah kawpa vâta ‘he su he apasiesai khao ma pi, eima y palâh ha ba aw ,y palâh n’awpa su’ tahpata, a khih moh châta ‘Pala’ tahpata ama vaw bi pa a cha.
