TICHHEIH LÔKÂH NATA TISAO THÂTIH
Tichheih Tisao he Chapi khih tawhta Nochhi-lâ 1km âhlâpa liata a y pa châ ta, lôkâh khophiepa liata Tichheih chavah he a lopa a châ. A moh yzie cha Tichheih chavah Beinô a tlana liata TICHHEIH/TIPO (pond) lai kawpa, a kua beileipa y ta, cha Tichheih yna su liana cha ta vahtiepa sakha Tichheih/Tipo liata za tla ta, he moh phaopata vahtiepa chhao cha ‘Tichheih chavah’ tahpata moh bipa a châ. Beinô tawhta Km 2 âhlapa- ahnawh lâta Tichheih Tisao he a y pa a cha. Tichheih Tisao he A&C Department nata Beino Adventure Club Meisavaih Siaha zy nata Date 16.10.2012 liata thlie pi ta, feet 346 hlei âsâpa a châ. Mara râh liata, Tisao âsâ chaipa hawhta pachâpa a cha.
He TichheiTisao liana he ta, alô tlyma thopahrei tlyma ama pazaw khiata cha, O ama kaw tlô tawhta ama sa zy pasa ta, ama luh zy pasa ta, chasi pâ ei ta, avawtuhpazy mâ lâta ‘eima sawnah luh zy maniah na vaw pâ chhei khai haw’, ama vaw tah ty.
Chavâta hlanota cha Tichhei Tisao he pasaipha achaleipa ta cha, âhnia chhao a hnia ngâ v’ei, ama vaw chi kaw. Tichhei tisao tawta 2Km rahchhôh âhlapa- atahma ta High school yna mathi liata Tipo y ta, Tipo lai kawpa achâpa vata, chyhsazy chhaota ama vaw cha-hi-chabâ ngâsâ tyh. He Tipo liana heta, alô lai kawpa sakha y ta, alô liana chata lyurahripanah zy hmô tyh ei ta, cha hleikhôta Theihiakô (Chapi) khih mo hatipa ama parupa mai ta, he lôpanô he ama vaw so tyhna su achâ. Ahnôchaita hatipa ama parupa chhochhi cha râh lâ asiepenaw pano ta alô chô liata hmô ei ta, hawtipa kia liata Thlalâ y ta he vâta hlano ta cha ama vaw chi kaw tyh.
Alô he Ko 1907 pa liata mawtah Tisai atlô nota supali supangaw lâta apatlaw ta, Tipo/Tichheih chhao aparao khai haw. Chapi Theihiah Khih liata ama y nota Tichheih Lôkâ liata apahrâp’einawh ta hawsai pakha kaw paru ei ta, Theihiako khih (Chapi) mo ta, nohluhpi tlua ei ta, hmo thei vei ei, Puhpa Satha Chhachhai hiehâpata Tichheih Lôkâ/Tisao cha alô nata zachhopâ ta âkhysai haw. Azo ta amô ta lyurahri p’einawh ta ‘abeipa mania angiathai la, alô maniah chhopâ khao kha y, hawsai cha, myla khih adei tita tipoby lâ zu ula, hawsai cha eima beinô ta acha vaw pie awh ei, tahpa ta amâlâ ta ama vaw chho. Khih adei nata Puhpa Satha Chhachhai cha khihsaw mo zy hnota chho ta, Theihiako khih mo zy cha, Tichheih/Tipoby lâ zu ei ta, tipoby liata Parihpi lai ngâsâpa âvaw paki thlâhpa chô liata, hawsai cha hmô ei ta, ahnatlâna zy apha kawpa vâta aly kaw ei ta, khih la ama kaw siekhei ha, ama tah.
Tichheih chakâ liata lyu ama tla nota puhpa Leikô lyu liata Palapaw nata Âvi-Babao zy alei ngâthlâh’pa vâta, nohkha cha Puhpa Leikô ta chapu vâphu liata anyukhâ ta, lyurahripa machanô he asaw hawtipa dawkia chhôh liata kaw phao lai ta, chapu chhô lâ cha akaw ngia ta, asaw cha chapu chhôh liata so ta, lyu liah lâ dawkia phao ta avaw sai ha, Puhpa Leiko cha vâphu tawhta za chô ta, hawtipa châ Barothu apôhpa nata ahmia zydua hnia khai ta, vaphu lâ ânyu ha heih, anô cha dawkia abiena taihta Avi, Babao nata Pala vaw phao ta,chapu chhôh lâ avaw ngia ta, asaw cha Barôthu avaw hlao khai hata, aro achhie kawpa vâta, aleilâ kaw thy ta, kaw mota ahu aso thlâpa vâta, asaw cha la ta, Tichheih Lôkâ la azukhei haw. Lyurahri p’einawh hihâhpata, puhpa Leiko saw hawsaipa cha zâ ta kaw paru ei ta, nohhlupi asie tawhta Tichheih/Tipo alô chô liata ama hmô heih hra.
Tichheih tisao liata a y pa lyurahri p’einawh nata Theihiakô khih mo he achhohia thai kaw ei ta, achâta ama hie apahâh ei ta, achâhta ady kaw ei ta, ama sawnah zy chhao Syhly zy achâ khohpata ama palao tyh. Zâlâ avaw châ nata amâ di chyu heih tyh.
Ahripe’inawh heta Larie zy Raha zy Lahmi zy nata Chhiepho zy akaw hla tyh ei ta, Chhiepho amâ kaw hlâna daiti liata laikachha pâhchhô pyupa tawhta,” Chau chau chi dauna ” za tah ei ta, Theihiakô khih mo chhaota pahno thai kawpata a pyupa liata kaw chahraopa ei ta amâ zâ hlâ tyh, ama hmâ khai nata thlai kaw pie ei ta, pâhchhô pyupa taw pyly ta, “Dautie dauta dau zieza”, tah pata apyupa liata ama chahraopa tyh. Ama hmo piena nata ahlâna liata ama pôhpa ahmô vei ei, chahrasala akaw hla ei ta, ama kaw pie thlâ hei tyhpa vâta ama hmo hneipa cha amâ hly thlâ ha tyh.
1).KHEIH-O: Tichheih Lôkâ liata kheih Bu 200-300 tlai y tyh ta, Chapi pasaipha zy ta, Vaopi paih nata abangiepata kheih bu he ama la tyh. Kheihti ama nie thota abiapa nata aburypa zy he, Kheihlôh nata Kheihsy châta zy hma ei ta, hmo hropa zy ta ama ri tyh.
Hlâno chanô rai chaipa cha thaisapa achâpa vâta, kheihlôh leipata thaisa thaipa acha leipa vâta, ody tota kheihlôh he amâ vao chyu. Kheihlôh he thaisana liata thai pahniasa n’awpata ama hmâh.
Kheihsy he hlâno ta cha, Ody tota Sahma ataopa ama cha vata sahma iehna liata ahu pamai n’awpata ama vaw hmâh kaw. Beirai, Raipi, Raita, Rachâ zy liata Sahma ieh tyh ei ta, aphieru he tho sei ei ta, â suthai kawpata chhieru ei ta, ahu azolei n’awpata Kheihsy ama bai thlu heih.Sawhthu pathuna lia nata barôthu o pamai n’awpa chhao ta ama hmâh hra.
2). LÔTHI: Tichheih Lôkâ liata, lôthi y ta, he lôthi he lyurâhpa sa nata pazu pavaw zyta thohna phachaipa ta ama hmâ tyhpa a châ, chavâta Tichheih chaby liata
rahsa nata pazu pavaw zy ama kapa chhaota thi hlei vei ei, rahsa nata pazu pavaw hmah aphaohpa ta he lôthi liata thlai achata ei ta ama tlâ lymâ ha ama tah. Tichhei Lôkâ he ama Thohna O tlai a vaw cha.
3). SAWTHAIKHAO: He Sawthai khaoh he, Tichheih Tisao aza tlana kiah liata a ypa châ ta, he he akhaopipa cha ta, akhaopipa tawhta 15mt âhlapa liata abâpahlie y ta, Sawthai he âvaw ngia nata akhaopipa liata angia ta, apuana la deikua abâpahlie lâ tawhta apua tyhpa achâ, he apuana abâpahlie ama tahpa liata riavaipa Sawkuthiepa So 2 rachhôhpa y ta, he Sawkuthiepa he atahma sawtliapa chha tawhta hmô’pa y khao vei, he Sawthai khao liana he ta hlâno viata cha sawthai 300 hlei apahrâ tyhpa hawhta reipa châ ta, atahma deikua achyhta apahrâ bâ nata ama pangiasa.
4). SAWZAW HMIA-AW -RÂH PA NATA VACHARI CHAOHNIE-RÂHPA: He su liana heta pazu pavaw, râhsa chito pahrâna su achâ hleikhô ta, Sawzaw hmiarâhpa nata Vachari chaohnie-râhpa chhao pahrâ ta, he Vachari chaohnie-râhpa nata Sawzaw hmia-râhpa he a hyhmata ka thei vei ei. Meithei ta âhnia kawpata ama ka pachhao ta theisa hmôleipata akapa hawh deita achâ ty. Tichheih tisao aza tlana kâ liata by chyhta y ta, cha liata he Sawzaw he nohsa âvaw ai tyh ta, he liata ama hmô tyh ama tah. Atliata liata Chapi pasaipha Puhpa Laithau Chozah chhao ta Meithei ta ka ta, y zie hnei hlei vei.
Chapi machânah reizie ta cha,Vachari chaohnie râhpa nata Sawzaw hmiarâpa he kô 200 hlei tlai a-uthei nata ama pangiasa, achhâpa cha Chapi Theihiakô khih liata ama y no tawhta ama vaw hmô tyhpa nata ama vaw ka thei beih leipa châ ta, phôhpa hawhta ama vaw rei tyhpa achâ.
Tichheih Lôkâ luh liata, “ÂHMYKÔ” lai kawpa nata abu ângia ngâsâpa y ta, athei pathei kaw tyh ta, he athei he râhsa nata pazu pavaw zy ta thata nie tyh ei ta, he he Chapi chyhsa zy ta, Meithei ta ka tyh ei ta, chahrasala kasao thei tlâ vei ei. Tichheih Lôka nata achheipa liata apahrâpa pazu pavaw he thiethei tlâ v’ei ei, nôpawpa zy ta ama reinazie ta azipa ahneipa hawhta rei ei ta, thokha ta ‘azino na ariachhie’ ama tah. Tichhei Lôkâ ama puasai tualeipata cha, ka awpata chhao rao hra vei ei ama tah.
5). Tichheih Lôkâh he Chapi khih châta cha Lyurahripa hryh liata alai chaipa (beichaipa) yna su hawhta pachâ ei ta, chielei/ tlâleina kyh liata ama theih no ta sahro ama hmâpa cha sahro liata a laichaipa Seihtôhpata amâ vaw theih tyhna su achâ.Sahro chyhpa- awh, vao, mie zy ta atheih beih v’ei. Apahrâhpa Lyurahripa he alaichaipa achapa vâta, a palôhpatlâh n’awpata Sahro liata alai chaipata ama theih tyh.
6) Sivia : Sivia he Tichheih Lôka liata apahrapa hrylia ta ahlu chaipa châ ta, no-âh âchhih kawna sakha cha, nohchhô lâ ta Tichheih Lôka liata y ei ta, avaw zoh nata Chapi beipa Rachi Chozah O liata ama kaw rie tyh, mydi ta Tichhei Lôkâ lâ amâ di heih tyh . Chapi beipa Okah cha, Sivia ie-sai abie thlâh ha tyhpa vâta, ama ochhôh liata raihria/ ypâh p’einawh chhao ama rie thei kaw tyh, chavâta Chapi bei Rachi Chozah ta, ama ypâpazy hnota, okah liata Sivia ie pathaina kyh liata ahyhma paphô lei awhpata achho ei.
Tichheih Lôkâh liana heta, Viadawh, Dawkho, Paotlâ zy tô tyh ei ta, kô 1960 hlâta cha, ama pyuryh zy thei tyhpa châ ta,Kri ama vaw zy tawhta deikua,ama pyury nata hmo amâ kaw hlâ tyhpa zy pahnopa cha khao vei.
Tichheih Lôkâh a khophiena liata Tichhei tisao atlapa he, sao daihti liata cha piry ngasa ta, Tisao aza tlana liata Ti azâ tlapa y khao lei pata, Meido / Tihu hawhta ngala hmô’pa y ta, sao daihti liata cha, nothlapa ala theipa chhao châ vei. Hlano ta cha lôkâh pa moh he, rei chakhy ngâleipa ei ta, a kiapâh liata chhao lyuhneipa nata râhbao pua awpa chhao ama zieh chhôh kaw.
Tichhei lôka chachâh lâ ta, Theihia kô lai kawpa y ta, he liata Chapi mo y ei ta, ‘Theihiakô khih’ ama tah, achhâpa cha ama khih su liata, Theihiakô laikawpa nata abuhrôh kawpa sô 30 alaipa y ta, akô ry tawhta Kahrô bao tyh ei ta, Theihiakô mohphao pata Theihiakô khih ama bi pa achâ. He Theihiakô he mopa chhaota lyurahripa pahrâ n’awpa ângia kawpa achâ. He Theihiakô lai kawpa he Hermon KNP Branch Chapi ta Ko 2007 liata thlu ei ta, a su liata Kross bôpata, Thlachhana O ama sa. He O he, “ Gospel Centenary Bethel”, ama tah.
