1) PALA TIPO: Mizoram liata Tipo lai chaipa ‘Pala Tipo’ he moto ta a thatih eima pahno kawpa a châ taraw pata Pala râh liata hmo ngiatlâh a châpazy hry liata a peimawh chaipa a châpa vâta palâsapa a châ. A thatih cha hawhta roh awpa chhao abyuh tu hlei leipa hawhta pachâ ei sihla. Anodeikua cha a moh awna Marapa zawpi zy ta eima pahno pasia awpa deikua a peimawh kaw. Aphôhpa phichhypa ama rei tyhpa Pari tawhta Tipo a vaw ypa hawhta pachapa ta ‘Pala Tipo’ (Swallow Lake) tahpa ta apahnopa zy he ado leipa ta, Pala râh liata a ypa Tipo a châpa vâta a yna râh (khih) moh pachyu pata ‘Pala Tipo’ (Pala Lake) tahpa ta awpa nata bipa a cha. Ado leipa ta eima cha ropa liata tlyma, bie reina liata tlyma ei aw ngakaw khiata cha Mizopazy ta ‘Lem Dil’ tahpa ta maniah ama awpa tlamaw aw tahpa chi achhih kaw. Chavâta amoh awna dopa nata bina chhâpa he kha hmah ei suh vy.
He leipa chhaota Tipo hropa Apinô nata Ataw ama tahpa chhao Pala Tipo tawhta â hla tu leipa liata y hra ta, Pala râh notla lâ Beinô Chavah kiapâh liata chhao Tipo sâkha a y heih hra.
2) PALA BY: Mara pa râh liata By hnei sisaw leipa pita, Pala By he eima hnei chhôhpa a châpa vâta hmo ngiatlâh a châpa hry liata pahlao ei sihla apha kawpa ta eima pahno. He By he Pala Chavah ta, â chakaihpa châta, hlano viata cha he By he azyduata Pala râh chhôh liata a ypa a châ. Chavâta ‘Pala By’ tahpa ta awpa châta, British daihti nota Mela ama sana maih chhao Pala Chavah haosa By chhâna taih saita ama sa tyh hrapa a châ. He Pala By he Marasaw zy chata byhna soh ngaitapa Khazohpata maniah a piepa a cha.
3) TABALAPA LÔKHAO (Bat Cave): He lokhao he atahmata Pala khih opah Mawla liata chavah sakha liata a ypa a cha. Cha chavah cha khacha rakha tlyma eima sao tawhta Lokhao ft.25 rachhoh athupa he y ta, cha liana chata Lokatabalapa hluhpi pahra ei ta, chavata Tabalapa Lokhao tahpata awpa chata, chavah moh chhao Tabalapa Chavah tahpa a cha hra. He Lokhao he chavah kaopa a seina zie ta a ypa chata, chavah kaopa Lo ta khupa a cha chai. Achhoh liata ti chhao alo hra. Achhoh angiapata, Hiakhala apuapahlie thei.
4) KALILIHPA: He he Pala rah liata hmo no-ah chhihpa sakha chata, Pala khirypa (Lôhbana Tlâh) liata a ypa a cha. He Pala khirypa liana heta Lôtlârâpa y ta, cha cha achô liata eima tlai nahta ary liata Tôhkalôhpa (thunder) athuapa pyu hawhta ‘Kalili…kalili…’ tahpa ta apyu aparo tyh. Chavata amoh chhao ‘Kalilihpa’ tahpa ta awpa a cha.
5) HNAWCHARIEPA: He he chavah sakha a cha. He chavah he chavah hropazy hawhta avaw puana hnawh sakha a hneipa cha leipata, no-ah chhih kawpata vaw puana hnawh sacharie atyh pakhypa ta chavah sakha taopa ta nochhi baih la aheih pata loh lyma ta, Maisa khih kiapah liata Pala chavah aza pahlyh.
6) AZINO/TLYLIANO: He he Pala chavah liata tilih moh chata, 1km rachhoh aseihpata tilih saita apatlypa a cha. Hlano ta cha Khasoh pahrana hawhta pacha ei ta ama chi ngasa tyhpa acha. ‘Chavah la asiepazy ta, Azino y lachao hmie awpa bah na pie la tah ei ta Ngachawpawpa dykha seihpazy he ngiahka laakaw chapie thlah ha e…’ tahpata manoh-mapaw viapazy ta ama vaw reih tyh.
7) RAMAWPAHEIPA: He he Pala rah liata no-ah chhihpa hmo sakha a cha hra. Atahmata Pala khih luhcho (Notla la) liata Ramawthihpa rah chata, hlano viata Ramaw a tahna (Mawtah) daihti liata eino (2) avaw paheina (atah leina) su a chapa vata ‘Ramawpaheipa’ tahpa a cha. Ko 2007 liata Mawtah nona chhao kha su lia he cha tah leipata, apahei ha heih. Cha chhao chata eitho (3) apahei ha tahna a cha. Palapa khihsaw ta su hrola tahpa Ramaw atah khai ha nota he Ramawpaheipa rah (su) liana heta Ramaw-thoti lana su chaipa ta eima hmapa a cha.
8) LÔHRY LÔKÂTISAO (Lohry Waterfall): He Lokatisao he atahmata khihparohpa eima pasiesai hapa Nochhi la 5km rachhoh ahlapa liata chavah sakha ‘Lohry Chavah’ liata a ypa chata, chavata Lohry Lokatisao tahpa ta bipa a cha. He Lokatisao he azatlana thabypa tawhta thliepa ta ft.50 rachhoh asahpa a cha. Sao daihti liata chhochhi cha Tisao apathluapa cha ru ngasa ta, a pyu chhao ru ngasa, mopha achhih kaw.
9) MAISA: Pala rah liata ngiatlah a cha kawpa sakha cha Maisa a cha. Lyurah sa zydua hry liata a lai chaipa Mara rah su hro la liata hmo awpa sakha mahta y khao lei pata, Pala rah liata ngala hmo thei awpa sakha a y ba. Khahla viata cha Pala Tipo chheipah liata pahra tyh ta, tahma deikua cha chyhsa ama tlaih-tlaoh tu hapa vata apahrana apasie pata, Ravaw Chavah nata Lopu Chavah likawh riapahlai pata apahra via aha ba. Atahma taihta rah a siepazy ta achah tat a amah mo ngakaw tyh.
10) SACHAH SI: He he Marapazy ta Asi eima tah tyhpa chata, Pala rah liata Asi zydua hry liata alai chaipa chata 50sq. ft rachhoh alaipa a cha. He Asi tawhna heta sah pyu ta, chavata ‘Sachah Si’ tahpata ama vaw aw tyhpa a cha. He he Pala chavah kiah, Maisa khih dady liata a ypa a cha. He Asi he Sa laipa Chaolia, Zuneipa nata sa hropa hluhpi ta ama nie tyh. Hlano viata cha he Asi he Ahripa apahrapa hawhta pacha ei ta ama vaw chi ngasa tyhpa a cha. He Asi he no-ah chhih kawpata lei naipa, a chathlaw a sihpa chi ta chado ta, cha liana chata eima tly khiata cha maniah apamoh pathla khei thlah hawpa chi a cha.
11) CHHAOPI (Saphao): Chhaopi (Saphao) he Pala rah chhoh Beino chavah liata a ypa chata, he he ahripa pahrana chata a opipa tah ei ta alopano o lyu ngasapa ta chado ta, a sa luh tawna, a mei-o, apalaopalana (varanda) athu ngathlahpa a cha. He su he su phapa mo tlah cha kawpa a cha.
12) LOAWHPA: He su he Pala rah chhoh liata ypa chata alo, lomathu hawhta y ta cha liata sakha alai chaipa y ta cha cho tawhna chata chyhsapa awhpa hawhta tlah aw tyh ta mahno mahpaw zy ta cha byhna, sa hneina zy, hri-ia pathaina zy, thina tlah taihta a aw thei tyh tahpa ta ama reih.
