By L.Chatô
Iana Khih he kô 1800 pa liata Myanmmar (Burma) râh Vyhtu Khih tawhta âzupa châ ei ta, atahma he kô 214 ta utheipa hawhta pachâpa a cha. Vyhtu Khih tawhta ama pua nota a ma za pahrâ tua chaina cha Chhaolo Khih nohdi Lôbô Khih adaih lâta Chhaolo râh Amohby liana khieta ama za pahrâ tuachaina a cha. Ama za sie nota ama khih bei châta amâ za chhipa cha Puhpa Thawngking Zawthapa a châ. Varo a khihsaw avaw chhihtha tawhta a khih nata râh sawzyta chariah chôchâh liata a khisaw thlâh a palôh thei âh leipa hawhta ama pachâpa vâta Puhpa Zatyu Chosa, Thlâtlâh bei cha ama khih bei châta amâ kaw la pakhua heih. Cha tawhna chata Puhpa Zatyu Chosa ta Iana Khitlâh cha a vao lyma ta, abei rai achhâna taihta âvao, a samohpa chhao a tahma he Chakhei Khih liata y ta, alapi saw chhaota Chakhei liata khih ama sa. Amoh cha Puhpa Chiako a châ.
Iana (Ainak) Khih moh biena chhâpa :- Iana (Ainak) he ama za y tuana Chhaolo Khih ry Amohby liata ama za y no he ta ama tikhaoh liata Cha-ia- Iavyh he hluh kaw ta, ama khih bei châta amâ za chhipa he py rei a cheihpa châ ta, Py reih ta Cha-ia he ‘Ai’ ta ei ta, avyhpa he ‘nak’ tah eita cha moh pahlyhpa cha ‘Ainak’ tahpa a châ. Cha tawhta Iana khih moh he a vaw pihpa a châ. Atano taihta Chhaolô nata Lôbô khih lika liata chavah y ta, cha cha Iana (Ainak) khih mo tikhaoh hnawh achâpa vâta ‘Iana vah’ tahpa châ ta, atahma tai Iana vah tahpa a cha.
Iana khih he hlâno cha chariah âsiehnao chhâ achâ vâta chariah riah chi ta ama khih he yna sukha liata ama thlalôh thai leipata, ama yna khih nata su he vaw pasie laih tyh ei ta, chavâta atahmata ama yna su he eisari ama kaw pasiena a châ. Iana chyhsa he Vyhtu khih tawhta â zupa ama châpa vâta, Vyhtu chyhsa dopa châ ei ta, ama khih beipa Thawngking cha Py reih a cheihpa châ hrasala âmo reih hmâpa cha Vyhtu reih he a châ. India rah liata Vyhtu he khi no deita cha eita Iana nata Siata Vyhtu reih a cheihpa a ma cha.
Iana Tinah râh zy : Iana rah he hlano abei daihti nota cha khino tyupa châta, Siata he Iana khih tawhta Iana beipata â kaw vaopa châ ta , Iana râh he Deirah râh châ ta, Beinô nata khih lika he âhnia chaina liata km 2 nata khophie âhlapa châ ta, arâh chhao he râhpalopa râh a châ. Lyuta tla thai lei awpa râhchhiepa nata lôkâhpa he a râhchhôh liata a hluh via. Lyuta ama tla chaina cha Beinô adai lâ he achâ via chai. Abei biehneina zy vaw chhâpa châ ta, abei zy ama vaw bâh tawhta cha District Council biehneina vaw châ ta, Iana nata Siata cha biehneina a no-eih ta avaw pachhaipata, râh chhao achhaih ta, atahmata ama râhri cha Iana nata Siata liakah liata Chavah Rakei chavah cha ama râhri a cha.
A rah ri :- Chho la liata Burma rah nata India rah ri Beino he chhola liata : Siata nata Iana lika liata Rakei chavah a cha.
Notla la liata : Chhaolo nata ama likah liata chavah pavah chavah a cha.
Mawla liata : Pivah chavah nata Beino Kolodyne a za tyhna a cha.
Kô 1966 liata Chhaolo tawhta Puhpa Laido ‘L’ nata a viasa thokha zy khih vaw sa ei ta chahrasala kô 2008 pa tawhta ama yna parohpa Chhaolo la ama kua pakhua khai haw . Iana rah liana heta hmo ngia tlah awpazy a y ba hra cha zy cha : Phusah tlah liata a ypa zy nata Beino liata Nara nata Kiathyu ama tuna zy Vahi a si ama tahpa zy , Chyva lih hlanota Iana ta ahripa khazo ama chhyh tyhpa zy a y.
Zyhna kyh lâ : Zyhna kyh liata kô 1962 hlâ via kha cha Awnanopa miakha ta y tyh eita, kô 1962 pa tawhna khata (UPC) United Penticostal Church a vaw duata, Ko 1970 tawhta Church of God âvaw dua heih hra . UPC he o dy 80 cha ei ta, ECM he 40 ama châ. Church of God he dyh 10 ama y, ama zyduata dyh 130 ama châ. Maluh lata 640 ama châ
Sawkha Department a ypa :-
1). Achuna School sathôh: Middle School sakha nata Primary School sano.
2). Thohna lâ ta Health Worker pakha.
3). District Council Forest Dept. tawhta papalih ( 4) ama kaw so.
4). Electric dept. 1 . He zy he ama châ.
Sawkha rai a hriapazie :- Iana khih tawhta sawkha rai ahriapa he khi hropa zy duahmo pachâpata rei khi chhao châ leipa ei ta, amoh tata 30 ama y hra.
Châ athaipazy :- Iana khih tawhta châ thaipa he khi hropa zy amâ duahmo pachâpata ama chyh ngâsâ, rei khi chhao pha vei ei. Ama zydua ta M.A 2, MBBS 1, Vety Doctor 1 nata BA 12 ama cha, PUC 25 hezy he atahma no tah châ athaipa eima hneipazy cha ei ta, B.A result ahâpazy cha 5 ama y hra.
Iana khih he khi chakipa châta, pachâ leipata kô 2011 pa tawhna khata PWD Department tawhta lâthlôh laipa kaw chhia pathao ei ta, atahma cha motor laipa chhao asie thei khai hra. Iana khih ta arairu khei chaipa lâthlôh nata ti, PHE Department tawhta suno lîata kaw pathla ei ta, akhaipa Electric lâ Department ta kô 1996 pa tawhta kaw tao hra ta, aly âchhih ngâsâ.
Kô 2014 March 23 liata Bible for Myanmmar team tawhta UPC Awnanopa hnota Bible nata Hlabu kaw rai ei ta, UPC Awnanopa amâ ly ngâsâ. Iana liata hmo a y mâh leipa Khazopa chakaona rai rôhnapa UPC Awnanopa Mara hla ama sa bei leipa cha aly ngâsâpata Khazopa no za maih ta Mara hla sai ama vaw sa ha bâ, aly âchhih hmeiseih.
