HLYCHHO PATHLA & AMÂ VAW PACHHAIHNAZIE.
By: HC. Chilo.
Bo – 1
Hlychho he apaw cha Kharei châ ta saw 4 (papali) chapaw a sa :
1. Zawtha.
2. Chozah.
3. Khaila.
4. Hlychho.
By: Pu V. Bualthiauva F/o Vanthawnga, Ex- EM (LADC).
1. He Kharei pathla liata a sehnai chaipa cha Hlychho châta, apathla zy cha Thlatla, Hiakha Rôtlâ liata ama y, he no heta Hlychho sahlao cha ti nata râh hnei veih ei, chyhsa vâtlâhpa hawhta ama châ.
He nota Zawtha nata Chozah deikua Hiakha notla (Burma) râh liata y ei ta, abei châ ei ta, ti nata râhzy ama hnei. Khaila deikua he ti nata râh ama hneipa pahnopa châ leipa ei ta, anodeikua pho riaphapa nata pasaipha ama châ.
2. Cha daihti tawhna chata Hlychho sahlao cha Thâtlâh (Burma) râh puasaipa ta Leisai liata areipi ta khihsa leipa ei ta, cha tawhta za sie laih ei ta, Marâpa râh lâ pangaipata ama za pua haw. He daihti he kô 1580 ra chhôh a châpata pahnopa a châ.
1. Pu V. Bualthiauva, Sangau.
2. Puhpa Khatia (L) Tipa ‘B’.
3. Puhpa Zachi Chozah, Tipa ‘B’.
Hlychho sahlao râh pazyhpata ama yna râh moh bipata moh ama zahnei :-
1. Tlari Hlychho.
2. Chaaw Hlychho.
3. Kapi Hlychho.
4. Khachha Hlychho. (Thlâtlâh).
I. Tlâri Hlychho : Leisai tawhta ama za pua tawhta Tlari khih liata ama y nota Tlari beipa cha sawchapawpa sa ta, amoh cha Iakhai a châ. Ano he Tlari Hlychho a châ. Chavâta Tlari hlychho tahpa ta ama aw. Atanoh Saikao beipa pathla nata a heinawhzy he ama châ via.
II. Cha-aw Hlychho : Leisai Khih tawhta Bôlytlâ liata ama vaw y tawhta, râh pazuahpata notla lâ râh tlô hlâta Hnaro khi kiapâ liata Cha-aw Tlâ liata khih ama za sa hra.Atanoh Laichai sawchapawpa Dawma pathlazy châ ei ta, Saikao, Siaha, Chapi, Zyhno, Amobyuh nata Lôdaw zy liata nata su thokha zy liata ama y hra.Burma râh Saby, Hnaro, Vasai khih lia zy ta ama y.
III. Kapi Hlychho : He sahlaozy he Hlychho sahlaozy amâ vaw chhai tawhta notla lâ râh pangai hra ei ta, Kapi tlâh liata a za bei hra ei ta, ama pathla zy cha Saikao, Zyhno, Theivâ nata su hropa Burma râh Arakan râh zy liata ama y hra.
He Tlâri Hlychho, Cha-aw Hlychho nata Kapi Hlychho zy he A.D. 1680 liata Marapa râh liata ama y pathao haw. Marapa râh azâ ngiatuapa châ ei ta, Marapa râh ama za y tawhta Tlâri Hlychho, Cha-aw Hlychho, Kapi Hlychho ta khao leipata Mara Hlychho tahpata awpa ama châ chyu. Cha y zie cha (Marapa râh liata hlychho zy) tahna a châ.
IV. Khichha Hlychho : Khichha Hlychho chhao he Marapa râh azâ ngiapa châ ei ta,Marapa râh nochhi lâchhâh Siaha, Thiahra, Amôbyu, Tisôpi, Siahatlâ zy liata abei hra ei ta. Châhrasala ama za pua tuana Hiakha Thlatlâ (Lai) nah râh mo abi pâpata Khichha Hlychho tahpa ta ama aw. He Khichha Hlychho zy he Marapa râh liata ama unawhpa zy amâ za pahlypa châ ta, Mara Hlychho ama tah awpa a châ nota Khichha Hlychho tlao ama tah haw.
He (Marapa) tahpa he N.E. Pary mongyupa ta ‘The Lakhers’ History a ro nota The Lakher (Mara) tahpa ta aropa châta, Mara tahpa he Hiakha chyhsa ta maniah ama aw na ‘Marasazyu’ tahpa he notla lâta a sie penawh tahna a châ.
Puhpa Thytu Tlâpyu, 1958.
Chavâta atanoh Hlychho sahlaozy he miakha sai châ pi ta, Marapa râh liata a y pa Hlychho sahlao cha Mara Hlychho châ ei ta, Lai (Py) râh liata a y pa Hlychho-pa maih Lai Hlychho (Khichha Hlychho) ama châ.Eimâ vaw pachhai tua no ta, eima y tuana su moh (Premitive) moh zy kha a pahnopata a moh panona a y khia tala hmo su leipa châta a pôhkhana aparaotuhpa a châ.
Bo – 2.
CHA- AW HLYCHHO YZIE NATA ABEIPA LAICHAI.
Hlychho sahlao amâ vaw chhai tawhta Bôly tlâh liata ama y nota Hiakha beipa Hlaipyu ta chhie za khei ta,chano ta nôhmeipa kei ta ‘Na Awhpanô a tih thla ngâpa he na pie la’ tah ta nôhmei nô ta pasaih leipa ta, a pasai leina chô ta Hlaipyu chata chhu raruah ta, nôhmeinô cha a palôhpasa ngâsâ ta,a cha ngâ kaw. Chano ta Bôlytlâ beipa Laichai Hlychho ta, Hiakha beipa cha sei ta a chô sao ta, a thie haw. Chavâta, Hiakha beipa a thiepa vâta Hiakha mota phu ama za la awpa cha chi ta, Cha-aw tlâh lôkâhpata âchadôpa liata a khi saw zydua chhao ta azâ paly ei ta, cha liana chata vâro ama pahrâ. Chatanachata khisawzy cha vaw pôh via lymâ ei ta, adôkhâ kawpa ta khi ama sa lymâ. Mara thâtih puhpa Mylai Hlychho ropa bu tho 236 moh teh.
He Cha-aw tlâh liata ama za y tawhta Laichai cha, khisaw a hluhpi hnei ta, sei hluhpi hnei ta, chadeih châ leipata Seih nata vao thawpa zy a hluhpi a hnei hra.
A o cha khihsawzy ta sapa ei ta, a seihna lâta (adoh) lâh 10 châ ta, a hâ lâta lâh 6 a châ. Cha liata ano nata a lapinô nata sawzy cha ama pahrâ. Anôtho zy chhaota.
A o tlyhmia liata pakaopi (dôhpa) chhô tao ta, a seihna lâta lâh 10 châta, a kawhna lâ ta 5 a châ hra. A pakao chhô liata Tlailai zy daopata, cha tlailai daopa liata satlia-laisazy cha amâ pakyh tyh.Chadei châ leipata, he pakao chhô liata Sahma sâtlâzy pazia ei ta, Sahma zy do ei ta, Satlia nata laihsa zy cha Awhkhypa hlazy sa ei ta, ama tha apha ngâsâ tyh.
He a O pakao kâ lâ chhâh pakao dôpa chhikhaw kiapâ liata ‘Cha-aw’ kô bô ta, cha cha ta vaw lai ta, a chia buhzy vaw pazaw ta, a buhzy pha ngâsâ ta ary liata pakaopi cha y ta, nohdipa pha ngaitapa tao ta, a thei a pathei daihti ta cha a bôzy pathliah ta, a kao apangieh hôlôpa cha ângia ngai ta kaw.
Cha-aw kô buh ry liana heta a Seihtôhpa a dao tliapa a lei asihpahri ngâpa cha a lôhzy palie ta, a seih tôhpa pahrei ngaitapa a dao tliahpa nata a ki a maih ta a maihpa zy apakao chhôh liana cha pua hei a ngia heih ama tah ngâpa cha, chyhsa zy ta ama hmô nata mopha tah ngâsâ ei ta, a rônah ngâsâpa ta ama pahno. Chavâta cha seihtôhpa cha Cha-aw beipa seihtôhpa tahpata ama aw tyh.
He nota Cha-aw Hlychho beipa seihtôhpa he seih hropa hlâta ânano viana cha, a pôhpa laita a ki seih ta, a daoh he a lei a sihpahri na taihta a tliah, he hawhpa seih he, he daihti nota abei hropa ta hnei tlâ veih ei. Laichai Cha-aw Hlychho beipa deikua he sakha dei châleipa ta seitôhpa nata seipanô a hnei hôlô kaw. A khih sawnah zy chhao khihsa thei viapa cha ama hnei bâ hra.
He vâta Laichai Hlychho cha ama parônah sa ngaita kaw.He daihti tawhta, ‘Laichai Cha-aw Hlychho beipa’ tahpa ta ama vaw aw pâ haw. He he mohnaona reih châ leipata, parônahsana moh tlao a châ. He daihti nota laichai châ-aw Hlychho he achheipâ liata chyhsa zy ta a bie nata hla ama nathlie via chaipa a châ.
A chheipâ khih abeipa zy nata chyhsa zy chhaota ‘cha-aw beipa vaw tlô tua sala bie eima pathlu aw’ ama tah ty. He he ‘Cha-aw Hlychho’ tahpa â vaw thaona a châ. Laichai he a sawchapawpa cha Dawma a châ.
By : 1. Puhpa Thytu Tlâpyu.
2. Puhpa Tiado Mathipi (L) 1957.
3. Puhpa T. Laihra Mawtla (Burma) 1958.
4. Puhpa Nolo Mathipi, 1956.
5. Puhpa Thadu Khithie, Saikao.
Bo – 3.
CHA- AW SEITÔHPA THÂTIH.
Cha-aw beipa Laichai abeinona khata, Seih a hluhpi hnei ta, a seihzy he Cha-aw lôkâh ta padôpa liata pahrâ tyh ei ta. Seih hropa hlâta laivia syulyu ta, a daotlia ta, a daotliapa he ta a lei a sih pahri ngâ kaw, a tôhpa chhochhi cha a ki zy maita, â ngia ngâsâpa a châ. Chatana chata Laichai bei pakao liata angia hei, pua hei, atahpa chyhsazy ta ama hmô nata arônah ama tah ngaita kaw. Cha-aw seitôpazy he ama kho ngaita, hneipa kho kaw ei ta ama uava ngaita tyh.
He daihti nona he ta, Tlâri Hlychho beipa Iakhai Zyuphei su liata a yno châta, chano ta alapinô Hnaro zuahnô beipa saw chanô hnei ta, alapinô cha ama khi Hnaro khi lâ a râ hata, chatana chata Iakhai sawchapawpa Khaicho Hnaro khih liata a pihpa cha liasa vaw lai hata, cha Khaicho dy awpa ta khih saw machâzy tuah ta, a kaw palasa, châhrasala, Hnaro beipa chata, vaw pasaih leipa ta, tlôsai machâzy cha keihrai vaw daita, a vaw patu khai ha ei. Khaicho nata Machâzy apapua thei n’awpata Hnaro beipata he hmozy he a vaw haw.
1. Cha-aw Seitôpa a dao atliapa.
2. Ngiadi lâh saripa.
3. Chhobai nao chhaopa.
He hmozy tlua ei ta, amoh hlatata ngiadi zy, Chhobaizy cha ama tlua, a peimawh chaipa cha Cha-aw seitôhpa he a châ.
Chanota Cha-aw Hlychho beipa Laichai lâ vaw ei ta, Laichai cha ta a unawhpa Iakhai saw Khaicho nata Machâzy pachha n’awpa ta Seitôhpa cha a pie haw. Chatana chata, seitôhpa cha za hao lai ei ta, lâthlô liata a sie lai nota a aoh laih lymâ ta, cha â aoh laih ngâpa cha Cha-aw Beipa Laichai cha ta thei thlâ ha ta, chavâta a ngiachhie ngâsâ ta, he hawhta hla a vaw phipâ haw.
“Iakhai na nô chama
Phiachhiava, Na paw kaleih maw !
Ei cha-aw seitôh aolai a kiah
Ro lo cha”!!
By : 1. Thadu (L) Saikao.
2. Thytu (L) “
3. Tiado (L) “
He daihti nota Hnaro khih nata Cha-aw tlâ Laichai khih cha âhnia kaw, chavâta Hnaro beipa ta Cha-aw seitôhpa he a kho chaipa a châ. Chatawhcha, Hnaro beipa chata cha hmo â hawpa zy a vaw hmô nata Khaicho nata Machâ zy cha a vaw pathlie haw.Machâzy ama za sie awpa nota Hnaro beipa ta hla a vaw phipa ei.
Hnaro Beipa ta hla a phipa
“Iakhai Machâ sahlao zy sai,
Nama khih bôpi nama tlô tita
Hnaro beipa paripi o chhô bao kha la
Vaw tah muh vy.”
Iakhai Machâzy ta hlata amâ chhy hra :
“Ta aw ma pi, eima khih bôhpi eima tlô tita la,
Keihrai thla thô (3)
Eima o pakha la, my pari na kho vei”! tahpa ta amâ chhy palie.By : 1. Puhpa Thytu (L) Saikao.
2. Puhpa Chamy (Saikao.
3. Puhpa Thadu (L) Saikao.Puhpa Mylai Hlychho Mara châbu tho 5,6 page moh teh. Cha-aw seitôpa thâtih.
CHA- AW CHALAI PAWTA
Atanoh marapa râh chhôh liata nô nata vah amâ hia nota sôh aparyh zâ ta,lyuchapa zy ta machazy biereipa ahly ei ta, ‘e achâ mâ ta, atahma cha chaw chalai paw ta, mâ cha nama hawpa hawhta achâ awpa tlaina acha,’ he he achhapa pahnoleipata ama rei tyhpa acha. Achhapa cha he hawna heta achâ :Cha-aw beipa Laichai Hlychho cha akhih saw thokhazy cha aseinah o châ a pachôsapazy châ ei ta, thokha a O chhôh liata a ypazy ama châ. Cha sahlaozy cha ta ama sawzy vaw sa ei ta,ama pizy phata, chhithai kaw ei ta,chazy cha dyh ama vaw châ nata ama nô paw zy ta ama mâ awpa zy kha ama beipa Hlychhopa Laichai hnohta ama mâzy bâh pahluh via awpata a haw ei ta,Laichai chhao ta a paryhsa thlâh haw, anodeikua syuhrâ cha haw pasai veih ei. Cha y zie cha, aseinah zy chhao ta ama beipa mâ haw rô tah ama haw thlâh hra tahpa rei n’awpata he hawhta ama reih. Atahmâ cha ‘Cha-aw Chalai paw ta’ tahpa ta mâ hawna nata aparyhna maihta cha bie paryhna châta ama hmâ lymâ haw.
Cha-aw beipa seizy ta ama zibeipa Cha-aw Hlychho beipa mâ tlu rô ta ama haw ha hra tahna a châ.
By : 1. Puhpa Tiado mathipi (Saikao)
2. Puhpa Chhalie Mathipi (L) Saikao
3. Puhpa Laihra Tlâpyu (L)
4. puhpa Thytu (L) Saikao.
BO – 4.
DAWMA CHA –AW HLYCHHO & A PATHLA THÂTIH
Cha-aw Hlychho beipa Laichai Cha-aw tlâ liata kô 30 daihmâ a bei chhôh na khata, saw chapaw 1 hnei ta, cha cha Dawma a châ. Dawma cha a vaw satlia tawhta, Laichai cha Cha-aw khih liana chata a thi haw. Dawma chhao cha lapinô hneipata, Cha-aw khih liata âbei lymâ chy. He daihti liana he ta, Hiakha Thlâtlâ zy nata kha ama chariah thlâ ha chy. Chavâta, cha Cha-aw tlâh (khih) liata y thlâ hapa cha ama ngia aryh khao leipata khihsaw zy chhaota, Sawhmô tlâh liata amâ kaw pasie chy. Cha liata ama y nota a sawchapawpa Râchhô a pihpa a châ.
Sawhmô tlâh tawhta za sielaih ei ta,Chapi, Satly za chapia laihpata, Thiahra amôbyu zy chapiapata atahmâ ta Amôbyu râh chhôh khochei tlâh liata khih sa awpata âparyh haw. Chatana chata Dawma cha a râh pakawh laihta Tapy tlâh (Saikao) râh nata Tipa ‘L’ râh nata Tipa ‘L’ Lôkâh khei -o zy khi â pahawhpa châta, he râh zy liata râhpaw (chhie) a la tyh. Tipa ‘L’ lôkâh khei –o khu a tahmâ ‘Dawma khei-o’ tahpata ama reih tyh.
Dawma cha khochei tlâh liata a khih sawzy chhaota y ta. He Khochei tlâ liata a y nona heta,a khih sawzy nata a râh chheipâ liata a ypa khih thokha zy nata abei thokhazy pahnopata khoh a cheih haw. Khoh a cheina chhâ pa cha seizy, seihzy, sôh nata Dawh a hluhpi hnei ta, khih sawzy hnei ta,amoh pathâh n’awpata khoh acheihpa achâ. He tlâh he khoh acheina tlâh achâ vâta ‘khochei tlâh’ tahpa a châ. He Dawma khocheina su (khih) kiahpâ liata lôkhao y ta, cha liata sôh nata dawh zy a hluhpi nyu ta, cha liata Dawbei, Dawkho-Rahô etc zy cha apasona a rei kawpa vâta dawbeih kiah zy cha pua ei (kei) ha ta, chavâta he khochei tlâh lôkhaoh sôhpasona su cha ‘Daw ei tlâh’ tahpata ama bi hra.
A tlâhpipata Marapa râh liata Hlychho beizy heta beibeipa nata khochei theipa y leipa ei ta, Dawma Hlychho deita he beibeipa nata kho a chei theipa a châ.
Dawma Hlychho he sei hluhpi hnei ta, râh apahawpa lia zy ta lyuzy hnei ta, cha liata khihsaw zy nata khi hropa chyhsa zy ta lyu ama tla tita sabai ti kha nata khophie atlapata râhpaw a khei tyh.
A tahmâ taihta pahno theipa liata Theivâ nata Amôbyuh likaw râh Theivâ râh chhô liata a seinahzy lyu patlasa ta, sâh thata ama hnei tyh, cha su cha a tahmâ taihta ‘Dawma lyu by’ ama tahpa a châ.
A sawchapawpa cha “Râhchhô” tah ei ta, a saw chanônô moh cha “Seipaw’ ama tah, cha moh yzie cha :
1. Râhchhô : Râh zy ei za chhô lai, râh ei za hnei lymâ tahna a châ.
2. Seipaw : Sei a hluhpi hnei nata âmozy chô liata ei bei, ei rônah tahna a châ.
Chatana chata Dawma cha kô 80 hleipa a châ nota Khochei tlâh liata a thi haw. Athi nota a thlâ cha lô-o ta taopa châta, a thlâ keikawh cha pitlohpa abôhpâpa ta ângia thei ama tah. Athi nota no 7 chhôh y khei ei ta, a thu ti cha tlâsy ta ama daoh.
Athlâ lâ ama pasie nota a sei chapawpa a hru thiethupa he, a hrohpa ta a thlâ liata ama pathlapa pa a châ. Aniepazy sopa ei ta, Dawkho thlâ chhôh liata pangie ei ta, a hrupa hnohta “Dawkho he a vaw chô tyh ma y’ tah ei ta, ahrupa a hro chy thei n’awpa nata Dawkho pyu ama thei thei n’awpa ta, Ramawh a lâ achôpata lâno seihpa cha thlâ chhô lâ chahrao ei ta, thlâ chô lâ ta Dykha a kaw chaluapa ta tao ei ta, cha liana cha Dawkho pyu nathlie tyh ei ta, Dawkho pyu cha noh 9 chhô ama theipa a châ. (â vawchô) tahna a châ.
Chatana chata sei chhao cha noh 9 tawhta a thi haw hra tahpa ama pahno. Chavâta a tanoh Dawma Hlychho pathlazy he chyhsa rietheipa, chapaw lâ chhochhi cha aduapapuapa ama sôh kaw, a y chhôhpa zy chhao vâtlâhpa dei ama châ.
By : 1. Puhpa Thytu Tlâpyu (L) Saikao
2. Puhpa Thadu Khithie (L) Saikao
3. Puhpa Khatia Solo (L) Tipa.
Râchhôh he Dawma sawchapawpa châta, a lapinô hnei ta, a lapinô cha Hnaihly zua châta, Hnaihly zua cha Iakhai –II tunônô a châ. Chavâta amâ châta Tâpy tlâh râhpaw â pahawpa thokha cha Puh mâ châta amâ haw. Ano cha khochei tlâh liata y ta, cha liana chata sawchapaw pano (2) pih ei ta, chazy cha : 1. Laichai – II, 2. Laihno – I, zy ama châ.
Râchhô khochei tlâh liata a y nota Saikao beipa Iakhai –II cha Khihlô liata a y hra. Râchho Hlychho a thi tawhta Laihno-I cha a unawh penawh thokha zy chhaota suhro lâ râhphapa tluapata ama sie lymâ. Laichai –II deikua cha Iakhai nata Saikao Tapy tlâh liata y kho ei ta, khih a zasa lymâ, Iakhai ta Laichai Hlychho cha a no hawh tlai tam oh ta,amapaw Dawma râhpaw âpahawhpa vâta sabai tikha nata khophie atlapata Saikao chyhsa zy ta Laichai – II ama pie tyhpa a châ.
Dawma pathlazy :
Laichai –II
1. Iakao Hlychho
2. Rapho Hlychho
3. Dotha Hlychho
4. Sany Hlychho
Laihno – I
1. Vyuto
2. Laichu
3. Kialo
4. Laido.
Laichai – II na cha saw papalih (4) hnei ta, chazy cha a chô liata palâsapazy khi ama châ.
Cha liana chata a saw chapawpa a hnei tua chaipa Iakao, ano he anô cha Zyhno beipa Taivyu Bôhia I- na sietanô a châ. Iakao cha Saikao liata y ta, anô hnohta Zyhno lâ zy khy tyhta, chavâta anô reih Zyhno reih chhao a thai ngâsâpa a châ. Asaw pathô penawh deikua he Iakaonô a thi tawhta nô hropa liata a sahpazy ama châ. He daihti nota Laichai –II Dawma pathla heta Puhpa Taivyu Bôhia-I Zyhno beipa sietanô ahiapa he abei pathla nata hneirôhpa a châpa vâta ama pahneisa khohpa a châ. Abei dychhiepa nata machhiepa sawzy ta Zyhno beipa Taivyu sietanô zy hia theipa châ leipa ei ta, hia theipa ta pachâ hra vei.
Iakao, Dawma pathla he Laichai –II sawchapawpa, Taivyu Bôhia –I Zyhno beipa sietanô chô liatahpa a châ.Iakao cha abeipa sawchapawpata pachâ lymâpa châ ta, a lapinô cha Saikao beipa Thylai sietanô, amoh Zômai a châ.Iakao he Saikao liata abeipa hawhta ama mopa châ hra ta, Arâ, seih,Viachao zy ahluhpi hnei hra ta, ano o chhôh liata sei nata nôthozy hneipata a y. Ano he Saikao liata Sabai sâh tinkha nata Khophie a tlôhpata Saikao khih saw zy ta ama pie tyh. Abei pathla a châpa vâta.
Nohkha cha Saikao mota “Chhâh” ka-ao chavah liata tu ei ta, cha liana cha Ngavâ, Ngapi, Thlyuhrâ, Tiapa, nata Phuvy nga laipa a thata tla ta. Cha cha Saikao mo ta zaphao tyh ei ta, Saikao beipa Thylai O liata tlôkhei ei ta, chatana chata, amâ rai tyh. He nga chhâh tlapa he abeipa nata hmotaothei viapazy cha nga laiviapa ama pie tyh.Ngavâ nata ngadi viapa zy cha machhie viapa nata a vâtlâhpazy ama pie tyh. Iakao chhao cha Saikao beipa Thylai ama pie hawhpa nga laipa ama pie tyh hra.
Nokha cha Saikao mota chhâh za vai heih ei ta,nga cha athata vaw tla heih ta,chano deikua cha Iakao cha Ngvâh alaichaipa ama vaw pie.Chanota Iakao cha a palôh tlâ leipa ta, a hie a hâ kaw. Chatana chata âma O liata a ypâpa Satlia thatlô ngâsâpa amoh Chiakhaw hnohta ‘chava la zu la, chhâh liata nga laipa Thlyuhra,Tiapa,Phuvy nata nga laipazy cha bokai ta kaw phaoh la, Thylai O la tlôkhei leipa la, keima o lâ vaw tlôkhei mah y’ a tah.
Chatawhcha, Chiakhaw cha Chhâh cha za vaih ta, Iakao ta a chhopa hawhta nga laipa sai ta Bokai ta kaw phaoh ta, a kaw tlô nata Iakao O chôkâ liata zapatlai (bô) ta, Saikao beipa cha hmo yzie cha pahno thlâh ha ta, châhrasala kawhkha hmahta Iakao maochhiena zieta bie reih vei.
Iakao he chyhsa riaphapa châ ta zâkha cha a zota, a chareina tawhta a vaw di ta, Saikao khi kathlao ama baona (Ahripa lâta amâ theihna su) liata abôhkô lai ngâsâpa abuh ru ngâsâpa, a chia ânai viapa liata ahripa (lyurâhripa) â tyuh thlâh hapa cha za chô ta, Iakao nata thata amâ tu. Iakao chata, ahripa sâ cha patu ta, chhaokhy ta, ahripa sâ cha o lâ a di khei ta, khih a vaw deih nata Lyurâhripa sâ cha moh ei ta, Arâ chaolahmi alyu ama tah.
Iakao cha Saikao liata vâro khih a sa tawhta, Laty nata Lôphia khih lâ sanawhzy a hmôpa ta sie ta, lôphia liata a y nota a thi haw. A hronoh kô cha kô 75 a châ.
Iakao (L) sawchapaw penawhzy :-
1. Tlaotu
2. Ngiabi
3. Rachhô –II.
A chô liata Iakao saw chapawpenawhzy thâtih nata ama pathlazy :-
1. Tlaotu S/o Iakao : Tlaotu he Iakao sawchapawpa hmiatuapa châ ta, a paw Iakao a thi tawhta a ryu topata khihsa ta, anodeikua sabai (sa) piepa châ khao vei. Ano sasyh ta âmohôpa châ ta, Saikao beipa Thylai hnohta Sabai sahaw pie leipata pa eipa achâ.
Alapinô cha puhpa Chhamy Sawthly Sietanô a châ. A sawchapawpa pakha Laihli (L) nata Sawchanô 2 a hnei. 1. Tapaw (Beily nô) 2. Vapaw (Hnaichinô) zy ama châ. Tlaotu he kô reipi hro leipa ta a sawchapawpa a satlia hlâta kô 45 pa ta Saikao liata a thi haw.
2. Laihli Hlychho (L) S/o Tlaotu : Tlaotu he Dawma pathla châta, pôhrao âdai thai kawpa nata chyhsa riapha kawpa a châ. Apuhpa Chhamy Sawthly chhithana liata vaw laiseih ta, a satlia tawhta Puhpa Riakô Hlychho sawchanônô Chiathlie Saikao a hnei. Saikao liata a y nota a satlia via nota Vaili mapawh (Rev. AR. Lorrain) ta thâtihpha chhopata a tuapa hry liata pakha a châ. Rev. Chakho, (Phohmô paw), Thabeipaw unawh zy chhaota Ratu nata Chhaongai khih lâ ama sie.
1939- 1945 V Force 2nd World War nona khata British mongyu Boman Captain nata SDO rai pakaoh ta, ano rai bao awpata Puhpa Thytu Tlâpyu nata abaotuh awpa Labour Sirdar zy châta Puhpa Laihli , Puhpa Khihmy, Puhpa Laihlu, Puhpa Tatyu nata Puhpa Chiangtova zy cha labour zy mohôtuh awpata raopa ama châ.
Puhpa Thytu cha Commander châta lapa châ ta, a hropazy cha labour sirdar ama châ.He nota Puhpa Laihli cha Tipa ‘V’ liata ama chhôhkha ta ama y hra. Adyu chhô zydua ta British sawkhâ baopata raihria ta, a hlao cha silver Tâka Rs. 30/- thla tota piepa châ ta, he leipa chhao ta, ration (niepa) saphâ, Dailua, Chini, Thopi zy piepa ama châ.
He adyuhna a pai tawhta kô 1945 March thla tawhta Tipa pheisai zy amâ lie khaipa vâta Saikao lâ amâ zu ha hei. Puhpa Thytu Saikao nata mohropazy chhao ama khih lata amâ lie khai ha hra. Saikao liata a y tawhta kô 1946 liata Saikao awnanopa liata Awnanopa hyutuhpa (Lay preacher) rai patusa ei ta, oct.1964 taihta a hria. Chaleipa chhao ta Saikao beipa puhpa Chhôhmô (L) ta ano ryureina bao awpata abei machâ ta a tao. Puhpa Laihli nata a chhôhkhazy he Puhpa Chhôhmô abeina daihti liata sabai sahaw chei leipa ta a pa-ei lymâpa a châ. Oct.1964 pa liata a thi haw.
Laihli (L) Sawnahzy :
1. Puhpa HC. Chilo
2. Puhpa HC. Khaitlu
3. Satlia HC. Mathia
4. Pihnô HC. Nosô
He a sawnah hry liata Pihnô Nosô Saikao cha 1996 pa liata a thi haw. Satlia Mathia chhao 1962 pa liata athi ha hra. Puhpa HC. Khaitlu deikua cha Abeipa ngiachhiena ta a hro thlâh ha chy.
2. NGIABI HLYCHHO
Ano he Iakao sawchapawpa panona châ ta, saw hnei leipa ta a thi haw.
3. RACHHÔH HLYCHHO 11
Ano chhao he Iakao sawchapawpa pathôhna (3) a sehnai chaipa châ ta, a lapinô cha Puhpa tevyu (a puhpa) saw chanônô Eingô ama tahpa hnei ta, sawchanônô pakha Siakai châ ta, Siakai cha a laihsa dyupa ta a thi haw, cha tawhta kô rei leipata Rachhô Hlychho chhao a thi ha hra.
1. PUHPA HC. CHILO
Ano he a paw Laihli Hlychho (L) châ ta, Dawma pathla liatapa a châ. 13th Sept, 1937 liata Saikao liata pih ta, a châ thaina cha High School leaving Certificate passed pa a châ. 1960 pa liata M.T.P. Hqrs. Saikao liata M.T.P. Coference liata Secretary ta amâ tlyhpa a châ. Cha leipa chhao ta 1963 june liata SK&LK (Satlia akaona nata Laihsa akaona) a tahmâ ta K.T.P. ama tahpa Assitant Secretary châta awnanopa ta hrua ta, Office liata a hria.
K.T.P. zy cha Awnanopa tlâhpipa ta Department sâkha ta amohôh hapa vâta MIEC (Mara Independent Evangelical Church) Saikao Hqrs. liata Office Assistant ta a hria.
Kô 1961 Oct. tawhta Branch Post Master rai hria ta, 1973 pa tawhta deikua cha sawkhâ rai D.C Siaha Office liata a hria haw. Chatawhta promotion hmôpa ta UDC lata kiahta 1990 tawhta H.A. (head Assistant) rai lata a kiahsâh. A tahmâ Supply Office, Siaha liata hria ta, 28.2.2011 liata a retire haw(a pihsi).
Awnanopa liata ECM & CCI(M) zy amâ vaw pachhaih tawhta CCI(M) liata nôpawpa pakha ta y lymâ ta, CCI(M) Assemmbly Chairman zy châ ta, Chairman a châ nota Collage vaih Assembly liata mongyuhna Australia tawhta ama kawtlô 1. Rev. Cutter. 2. Rev. Topass. 3. Rev. Sanda Donwell zy ama châ.
Kô 2008 liata Siaha Vaihpi CCI(M) liata village Pastor rai a hriahai no ta ECM Shalom Local Church lâta â pasie haw, awnanopa a pôhkhana kyh khona vâta. Alapinô cha N. Vasti châ ta, kô 2006 July 15 liata â pahâ haw.
Puhpa HC. Chilo sawchapawpazy :
1. HC. Augustine M.A (Pol) (L)
2. HC. Abraham (L)
Abraham deikua cha târi 31.12.2005 pa liata âpahâ haw.
HC. Augustine chhao 2.10.2012 pa liata âpahâ ha hra.
Asaw chanôzy :
1. Nokhu, HSLC. – Senior Gram Sevak rai a hriahai.
2. Noma, HSLC. – Lungsen liata vahpa hnei ta a y.
3. Lydia, M.A. – High School Teacher rai a hria.
4. Benny Hlychho, B.A. – Middle Pachutuhpa.
5. Euredice, B.A. – Supply Dept. Siaha liata a hria.
Khi a chô liatapazy khi a sawnah, chapaw nata chanôzy ama châ.Alahpinô âpahâ tawhta J.Mawite nahta 2008 April no 30 pa liata ama hnei.
2. HC. Khaitlu : Anochhao he Laihli Hlychho Dawma pathla liatapa châ hra ta,MC.H.C Chilo nawhta acha. Ano he sawkhâ rai police Hav. châ ta, kô 2013 November, thla liata a Pension haw. Chakaona liata CCI(M) liata Machâ châ hra ta, a tanoh taihta a chakao haipa a châ.
HC. Khaitlu Sawzy :
1. HC. Rosanga, B.A.
2. HC. Calvie, P.U.
3. HC. Heilai
4. HC. Beirei
5. HC. Heisia, HSLC.
6. Bethany.
7. HC. Beirei, HSLC.
Bo – 5.
RAPHO CHA-AW HLYCHHO.
Puhpa Rapho Hlychho he Dawma pathla Puhpa Iakao nata Dotha Hlychho unawhpa châ ta. Chavâta ano he Laichai Cha-aw Hlychho pathla a châ hra, Râh phapa zyh (tlua) laihpa ta, notla lâ ta sie laihta Lôdaw liata buakha khihsa ta, cha khai tawhta Rabu khih liata khisawzy hneipa ta abei ta, sabai sahaw zy niepa ta, kô khazie chhôh tlyma a bei ta, NE. Pery mongyupa Marapa râh atly daihti nota abeina cha a pazao lymâ. Adyuhpi 2-na (Second World War) achhâna lâ liata abeina zy pachhâ pathao laihpa châ ta, India nata Burma amâ vaw chhaih tawhta Rabu khih cha Burma râh chhôh liata a y haw. Abei châna a bâh tawhta a rei leipa liata a thi haw. The Lakhers N.E. Pery tho 581 moh teh. (Chief of Lakhers & Villages).
Asawnahzy cha sawchapaw pakha-1 nata sawchanô 1. a hnei. Chazy cha, asawchapawpa Siachhô achâ. Asawchanô cha Pihnô Khailô mahnô châ ta, a tahmâ Puhpa H. Valai Ex- EM (MADC) nô a châ.
Siachhô sawchapawpa cha Hrâbi châ ta, Hrabi sawchapawpa cha Dôtha a châ. Dôtha sawchapawpa cha Thachhua a châ. Atahma Lôdaw khih liata ama y.
Sany Hlychho : Sany Hlychho he Laichai Cha-aw Hlychho beipa sawchapawpa achâ. Dawma Hlychho pathla a châ.
Ano he a unawhpa Iakao Hlychho Saikao zy hnohta khihsa hra ta, alapinô chhao Hlychho zua hnei ta, Saikao liata abei machâ châta, chakhai tawhta Amobyu liata y ta, daihti rei leipa liata Amôbyu khih liata a thi haw.
Chapaw saw hnei leipa ta, a saw chanônô zy cha :
1. Pihnô Pakai saw hnei leipa ta a thi haw.
2. Pihnô Maita Chhâkhai nô
3. Pihnô Siapaw Thadia nô
4. Pihnô Ipaw Laichho nô (L.C. Hlychho Ex. MDC.MADC. & Vabeiha Hlychho, Director Tourism, Mizoram zy nô a châ.
Dôtha Cha –aw Hlychho :
Dôtha Dawma pathla ano he Laichai Cha-aw Hlychho-II sawchapawpa châ ta, ano he satlia hmiphapa nata pôhrao âtlai kawpa a châ. Chyhsa thatlôpa châta, Marapa saw liata cha thatlôpa vâta amoh a pathâpa a châ. Ano he Rapho Hlychho nawhtapa a châ.
A thatlônazie palâsana :
1. Saikao beipa Thylai ta Opi a kiah nota Seih a ki khakha a seihpa (a ki nachahpa) thie ta, cha seih cha satlia pahraw-10 ta laitlâ la khaipa achhuah ei ta, khai thei veih ei. Dôtha Hlychho kei aw ei ta, ano ta seih cha a ki nata achaolahmi patu ta, laitlâ lâ a khai haw.
2. A tahmâ Laty khih nata Kiasie khih likawh lâpi liata alô achhahna lâta inches -4 a chhapa nata a kawhna lâta 4 1 2 feet alaipa cha lâpi sie apakhâpa vâta chalo ta, lâpi aikachha lâ a khai thlâ haw. A tahmâ taihta cha alô cha ‘Dôtha lôchalopa’ tahpa a châ.
3. Eikha cha khih ama tlyna liata lâpi aikachha liata Ridy thokôpa liata akiahpa hmô ei ta, Machâ sahlao ta Dôtha chho ei ta, ano ta “Ei sie nawpa lâpi na taopa teh u tah ta” Lâpi cha taopa ei ta, Ridy cha chhawh ta, Ridy cha patu ta ei khapi ta chhaokhy ta, Ridy cha a lei liata â thlu thlâh haw. Chataw ta Machâ zy chata ridy cha amâ kao.
4. Eikha cha, Hiakha khihpa ta Hiakha Chaizô vaw zuah ta, Hiakhapa kei ta “Na chaizô kha a hâ a tiapa lâta ei chao makiepa liata chakie sala, nâma ta a vaw daophi la nâ daophi thei leipa khia tala Chaizô cha a saipa ta ei la aw’’ tah ta. Hiakhapa ta Chaizô cha Dôtha chao liata zie ta, a thata parai ta, parai thei khao vei. Chavâta Chaizô cha a pie thlâ ha hra ama tah.
5. Hlâno ta cha Lyu taona daihti a châpa vâta, ahrei,atu, tâkô zy he chhaichhi hmâ via chaipa a châpa vâta, a hâ zy cha ramaw thabypa tawhta ama tao tyh. Thokha cha ramaw thabypa he Tâkô ta nata a hrei zy ta ama chhaw tyhpa a châ, Dôtha deikua cha tluata a khopa a hmô khiata cha akuta tlâ aphia lymâ ama tah.
6. Saikao Beipa Thylai Hiakha Thlâtlâ lâ asie nota Dôtha Hlychho he a chhi heih, he nota Hiakha chyhsa ta a seih nata vao ama thiepa dawbei kha-9-pa liata sa nata ti chhaota ama sopa cha, Thlâtlâ mo hmiakô ta lômathu liata khai hei, chalo hei tah ngâkaw ta, cha cha ama hmô nata Thlâtlâ satlia ta ama chi ngâsâ ama tah.
Chavâta Saikao beipata, a khitlyna maihta a nawhta Dotha Hlychho cha â chhi lymâ. Chavâta Saikao beipa Thylai chhao ano he âly kaw. Dôtha he sawchapaw hnei leipata sawchanô cha pihnô Kihao châ ta. Kihao sawchanônô cha Pihnô Sady Saikao liata Puhpa Chihmô S/o Rev. Seilai lapinô a châ. A tahmâ Saikao liata ama y.
Puhpa Zakhu Hlychho châbu “The Hundred years of Maralnd” tho 111-113 moh teh.
1. LAIHNO CHA- AW HLYCHHO : Laihno he Dawma pathla liatapa châta, ano he sawchapaw 4 a hnei chazy cha :
1. Vyuto. 2. Laichhu. 3. Kialo. 4. Laido.
Laihno he Saikao Tapy tlâh liata y ta, a unawpenawh hnohta khihsa laita, a rei leipata a thi haw.
2. VYUTO CHA-AW HLYCHHO : Vyuto he Laihno – I saw chapawpa a châ, Saikao beipa ta khihchapei (Laty) khih liata Saikao beipa ryurei lâpata asopa a châ.
Ano he British mongyuhpa Peter Lunglei SDO, Saikao liata vaw tlô ta, (1946) Vyuto chhao Saikao lâ a vy hra ta, mongyuhpa Peter SDO hnohta hmo hia awpata a vaw tlô hra.A hmo hiapa âchhuahpa cha Khochei tlâh atahmâ ta amobyu râh chhôh liata a ypa he hiapa âchhuah. A hia hlâ ta Saikao liata abei Machâ zy a chhohia tua, chazy cha 1. Puhpa Thadu (Thadia mahpaw) 2. Puhpa Tiado (Roma paw) 3. Puhpa Chhamy Sawthly azyu (Pawchi paw) zy ama châ. Amo chhao ta ‘he hawna heta reih mah y’ ama tah.”Khochei tlâh he eima mapaw Dawma abeina su (râh) châta keima Vyuto he Dawma pathla liata a seihnai viapa ei châ vâta eima râh khocheirâh he na pie la, tlâchâ (khih hnei theina châ) tah mah y ama tah. SDO ta ‘ahy zy ma he khochei tlâh he Dawma râh tlai a châ na tahpa châ pahnokheipa ama y ma’ a vaw tah khiata la keima ta ‘Keimo eima y’ tahpa ta chaw reikhei aw tahta ama chho.
Chatawhna tlai ta rei awhpa ta Vyuto cha Seihtôpa SDO châta thie ta, cha bie cha Saikao beipa Chhohmô ta a thei nata he hawhta Vyuto hnohta a hia “A u y, nâma nata keima cha miakha sai eima châ, chavâta he hmo he reih leipa la bâh y mah y, nâma cha ei râh chhôh Laty Lyutlana maihta râhao (Lyuphapa) nâ tlyh tyh aw. Cha leipa ta Sabai Sahaw chhao ei cha pie aw, tahpata a chho. Chavâta, Vyuto cha ta âhawna cha a pyh ta, hiah khao vei. Chavâta seihtôpa dei cha thie tlavaih ta, a sapa cha vâtlâ ta ama nie, he nota Saikao khih Machâ thokha cha ama hie a hâ kaw.
Vyuto Pathlazy :
1. Laihno (L)
2. Mawla (L)
3. Laichai (L)
Laihno nata Laichai zy cha ama thi thi khai haw, chi hnei leipa ta Mawla deikua cha saw chapaw pakha hnei ta, Pawhra a châ. Atahma Kaochao khih liata a pahra.
By : 1. Thadu (L)
2. Tiado (L)
3. Chhamy (L)
4. Zavai (L).
LAICHHU CHA-AW HLYCHHO
Ano he Dawma pathla liata Laihni -1 sawchapawpa a châ, ano he Saikao tawhta Tôkalô lâ ta sie ta, cha liata khih a sa.
Ano he sawchapaw hnei leipa ta, Pihnô Chhiepaw (L) (Hrathy nô) (L) nata pihnô Saikaw (Sâchô Beita) Saikao nô zy he a sawchanô zy ama châ. Chatana chata kô rei hro leipa ta a thi haw.
Amoh y zie-Laichhu tahpa yzie cha eima laina he maniah ama chhu haw tahpa reina a châ.
KIALO, CHA-AW HLYCHHO
Ano he Dawma pathla liatapa châ ta, Laihno – 1 saw a châ. Saikao liata a unawhpa Iakao Hlychho zy hnohta khihsa laih ta a ypa a châ.
Asaw chapawzy :
1. Thlawma (L)
2. Hiama (L)
3. Satlu (L)
Thlawma nata Hiama cha sawchapaw hnei leipa ta ama thi haw. Satlu deikua cha a saw chapaw zy ama y.
SATLU Sawnahzy :
1. Hmôly.
2. Hmôtha.
3. Hmôsia.
LAIDO CHA-AW HLYCHHO
Ano he Dawma pathla liatapa cha ta, a sawnahzy cha he hawhta ama châ.
Laido pathlazy :
Zahie S/o Laido Hlychho
Lôsa S/o Zahie Hlychho.
Beihnai S/o Lôsa Hlychho.
A hropazy cha thi khai haw ei ta. Beihnai S/o Lôsa cha a tahmâ Lôdaw khih liata a y.
He Laichai Cha-aw Hlychho pathla nata Dawma Cha-aw Hlychho zy he ama pathla sahlaozy cha India Mara nata Burma Mara râh zy liata ama y hôlô. Cha-aw Hlychho he Mara beipa ‘Chief of Mara’ tahpa liata amâ hlao hra. The Lakher N.E. Perry ropa page No.581 liata moh teh.
NB: Puhpa Laichai Cha-aw hlychho nata apathla Iakao Hlychho zy âmo O chhôh liata ama pa ysapazy thokha Cha-aw Hlychho pho âhlypa zy y ei ta, chazy vâna chata Cha-aw Hlychho zy he pachâna a nai viapa hawhta ama pachâ tla maw tyh.
Dawma nata Laichai pathla a dopazy cha pho siapa nata chyhsa siapa ama châ khai.
Conclusion : He Hlychho thâtih ei ropazy he a hlu viata eima pahno thei n’awpa nata chi nata phokhapa zy liata eima pachâna dâh âchhôhkha via thei n’awpa nata thapasana nata kyhpachâna eima hnei via n’awpa a châ.
A tanoh Politic liata chhochhi cha chi nata pho thapasana zy pôhta, a pôhkhana nata thatlôna zy eima hnei via n’awpa a châ.
Chavâta chi kha, phokhapa zy âmo pahno leipata pôhkhata eimâ syhpahmao awpa a châ. Chatana chata Marapa liata, Tlôsai, Siaha, Vytu, Hawthai, Chapi, Zyhno tahpa zy he marapa chi pathla châ pi ta, eima mapaw – miah pathlatuhpazy moh he pho lâta tlâ eima hmâpa châta, marapa eima châna liata sia ta, eimâ pôhkha rili awpa a châ.
Chatana chata a pananona y leipata, kyhpachâna nata a deichhy raihriepata marapa râh liata chi nata pho a ypa zydua, a dyryhpata eima râh liata khotalai chyupa ta eima pahrâ awpa a châ.
