Chyna Poh
Chyna poh he hlano manô- mapaw zy ta ama reina zie ta cha Ngiaphia Sizo râh, beinô chavah tawhta â hla tu leipa liata Lôpanô lai kawpa sakha y ta, he lôpanô he fit 30 rachhôh âsâpa a cha. Laithlu he Ngiaphia Sizo tawhta Beinô chavah la Sao vaw awpata sie ta, a sao vaw hai nota tlâh liata Lôpanô chô liata poh saihpa âzawh thlâ hapa a hmô nahta a no-âh kawhta, poh cha la awpata thlai kei ngai ta, la ta, khih lâ a siekhei haw, he poh he Vâhiahnah ta ama zaw pa châta, Vâhiahnah ta Laithlu cha a chadai ei ta, chahrasala o atlô khei hma haw. Vâhiahnah cha azoh tualeipa ta cha khichhôh angia ngâh leipa ei ta, avaw zo nah ta Vâhiahnah cha avy ei ta, Laithlu hnohta ‘poh kha maniah pie pakhua teh’ tahpata thata hiah ei ta, khih adeih daihmâ hapa vâta Laithlu cha ahiehâh pata poh cha la ta, barôhthu pahly pata ai-kah lâ kaw thy ta, “ a la t’u” tah ta, Vâhiahnah cha Barôthuh ama hao kawpa vâta a râsai ha ei ta, Vâhiahnah cha ama poh ama i tuhpa vâta, avy heih ei ta, ‘Laithlu y poh cha na pasai leipa chhaota apai zy chhâ tai la, maniah pie teh’ tah ei ta, Laithlu cha pohpai cha tai ta a pie ha ei, cha tawhta Vâhiahnah chhao ama lie haw.Laithlu lahpinô ta poh kiky ama zeina dâh cha mo lyma ta, alyu pata sa achhuah ta, he liata peimaw pazy cha, Chari, Tita, Amao,Chyrai, zy nata palazy cha chho kho ta, Laithlu poh avaw cheipa mo pakho pata asa haw. Chyhsa ta Laithlu lahpinô poh sapa cha Vâhiahnah poh nata mo pakho ei ta, pachhai thai vei ei, he heta, Mara Chanôzy, kuzo thaizie apalâsa ngâsâ.
Nohkha cha, Laithlu sawchanonô Maida thi ta, Vâhiah poh cha paphao ha ei ta,, Laithlu mâ liata, Maida cha avaw lua ta, ‘ei paw y poh ei phaopa kha, athihpa khih tlôkhei vana. Hawhlypaka liata, Vâhiahnah Chhochopinô ta “he poh he keimo eihna” tah ta, eina chhuh haw chavata, athihpa khih tlôkhei vana’ tahpata apaw Laithlu cha chho ta, Laithlu cha apalôh pasa ngâsâ ta, thi tawh chhao taihta athihpa khih angiakhei theileipa poh cha, “CHY ÂNAPA’ na a cha” tah ta, “Chyna poh” tahpa ta ama bi pâ hapa acha,ama tah.
Ahmiatuata cha, “POH BI” tah ei ta, Laithlu sawchanonô Maida athihpa khih ângia khei thei vei tawhta,“CHYNA POH”ama tah.Laithlu apalôh apasa tu hapa vâta he hawhta hla aphipa a cha.
Maimau pohtha padau ka zaw chala,
Vy nâ phaonô nôpih nathiena mawh sy.
Recent Comments